Хәйбулла районы халҡы махсус хәрби операцияла ҡатнашыусыларға ярҙам итеүҙә ҙур әүҙемлек күрһәтә. МХО башланғандан алып, райондан йыш ҡына төрлө аҙыҡ-түлек, йылы кейемдәр, маскировкалау селтәрҙәре, техника, кәрәкле приборҙар һәм инструменттар тейәлгән гуманитар ылау оҙатыла. Был эштән бер кем дә ситтә ҡалмайҙыр. Бөтә район халҡы, шул иҫәптән предприятиелар һәм ойошмалар, учреждениелар коллективтары, эшҡыуарҙар, йәмәғәт ойошмалары, ирекмәндәр, хәрбиҙәрҙең яҡындары һәм туғандары ихлас күңелдән был изге ғәмәлгә үҙ өлөшөн индерергә тырыша. Ауылдарҙа ла, район үҙәгендә лә хәрбиҙәр өсөн бик кәрәк булған маскировкалау селтәрҙәрен үреү менән шөғөлләнәләр. Төрлө миҙгелгә ярашлы күпме селтәр бәйләгәндер инде улар һанап бөткөһөҙ. Ә яугирҙар әйтеүенсә, фронтта ул бик кәрәкле һаҡланыу сараһы. «Хәйбулла районы халҡы махсус хәрби операцияның тәүге көндәренән үк яугирҙарыбыҙға ярҙам күрһәтә. Тыл һәр саҡ фронтҡа ярҙам иткән һәм был – уның изге бурысы. Хәрбиҙәребеҙ – беҙҙе яҡлаған ҡалҡан, ә беҙ – ҡалҡан тотҡан ҡул. Башҡаса булыуы мөмкин түгел. Тик шулай ғына еңеү яуланырға тейеш», – ти ирекмәндәр. Был юлы район хакимиәтенән «ГАЗель» һәм күсмә мунса, район халҡынан, МХО-ла ҡатнашыусыларҙың туғандарынан, яҡындарынан шәхси посылкалар, генераторҙар, бензин бысҡылар, шәхси гигиена һәм көнкүреш әйберҙәре, аҙыҡ-түлек (ҡайнатмалар, тоҙламалар, картуф), яугирҙарға кәрәкле приборҙар һәм башҡалар оҙатылды. Шәхси эшҡыуар Рөстәм Усеинов «Риша позывнойлы хәрбигә «Лада Приора» автомобилен оҙатты, ә егеттәргә милли ашамлығыбыҙ – ҡаҙы боҙолмай барып етһен өсөн “Балта” коворкинг үҙәгенең хужаһы Рәмил Билалов күсмә һыуытҡыс яһап биргән. Хәйбулла халҡының гуманитар ярҙамы имен-һау барып етеп, яҡташтарға тыуған яҡ сәләмен еткерһен, күстәнәстәр көс-дәрт өҫтәһен, кәрәк-яраҡтары хеҙмәттәрендә ярап ҡалһын. Яугирҙар тиҙерәк Еңеү менән тыуған яҡтарына аяҡ баҫыуҙарын теләп, артабан да берҙәм булайыҡ! Филүзә Ишемғолова, Хәйбулла районында Ғаилә хеҙмәте белгесе, «Тыуған тыл. Хәйбулла» яугирҙарға ярҙам итеү төркөмө етәксеһе: –Хәйбуллалар тарафынан йыйылған сираттағы ылау был юлы Луганск яғына, башлыса штурмовиктарға юллана. Яҡташтарыбыҙҙың заявкалары буйынса «Тыуған тыл. Хәйбулла» ирекмәндәр төркөмө тарафынан йыйылған аҡса иҫәбенә генераторҙар, квадрокоптер, дрондарға ҡаршы махсус сигнализация һәм одеялдар, рациялар, бензин бысҡылары, шөрөп борғостар, балаклавалар, инструменттар, саморездар һәм ҡаҙауҙар, көн дә кәрәкле әйберҙәр, медикаменттар, 35 маскировка селтәре һәм 6 масикровка халаты, аҙыҡ-түлек, окоп шәмдәре, төндә күреү бинокле, тактик күҙлектәр, еүеш салфеткалар, адреслы посылкалар һәм башҡа гуманитар йөк әҙерләп оҙатылды. Хәрбиҙәр беҙҙең ярҙамға мохтаж һәм уларға хәлдән килгәнсә һәр яҡлап булышлыҡ күрһәтергә тырышабыҙ. Яҡташтарыбыҙға гуманитар ярҙам йыйыуҙа һәм алып барыуҙа ҡатнашҡан кешеләрҙең барыһына ла оло рәхмәтебеҙҙе белдерәбеҙ. Сығанаҡ: "Хәйбулла хәбәрҙәре" Фото һәм текст: Раян Атанбаев