26 июлдә Өфөлә Башҡортостан Башлығы Радий Хәбиров Рәсәй почтаһының 30 йыллығына арналған тантаналы сарала сығыш яһаны. Төбәк етәксеһе республиканың “Рәсәй почтаһы“ Федераль почта элемтәһе идаралығы коллективын һөнәри байрамдары менән ҡотланы һәм дәүләт наградаларын тапшырҙы. – Башҡортостан өсөн “Рәсәй почтаһы“ ҙур әһәмиәткә эйә. Беҙҙә бөтәһе 1280 почта бүлексәһе бар, шуларҙың меңгә яҡыны – ауыл ерендә. Унда ете мең самаһы кеше эшләй: хаттар һәм посылкалар, пенсиялар һәм пособиелар ташый, шулай уҡ яҡташтары өсөн мөһим социаль ориентир һәм өлгө булып тора, – тине төбәк етәксеһе Радий Хәбиров. Башҡортостан Башлығы шулай уҡ республикала почта элемтәһе бүлексәләрен комплекслы яңыртыуҙы дауам итеү кәрәклеген билдәләне. – Һуңғы ике йылда Башҡортостанда 55 почта бүлексәһен тәртипкә килтерҙек. Был хеҙмәтләндереүҙәр исемлеген киңәйтергә, хеҙмәтләндереү сифатын күтәрергә мөмкинлек бирә. Яңыртыу буйынса эште, айырыуса ауылдарҙа, дауам итәсәкбеҙ, – тип йомғаҡ яһаны төбәк етәксеһе Радий Хәбиров. Фото: glavarb.ru