Төп маҡсат – табыш түгел, ә социаль ярҙам

Бөгөн Өфөлә Башҡортостанда социаль эшҡыуарлыҡтың үҫешенә арналған матбуғат туры эшен башланы. “Беҙҙең киләсәк” төбәктәрҙең социаль программалар фонды ойошторған был сараның программаһында журналистарҙың социаль эшҡыуарҙар менән танышыуы ҡаралған. Быйылғы июнгә ҡарата Башҡортостан һөнәри Реестрға ингән социаль эшҡыуарҙар һаны буйынса Рәсәй төбәктәре араһында икенсе урынды биләй. Республикала 610 социаль эшҡыуар теркәлгән. Матбуғат туры программаһына ярашлы, киң мәғлүмәт саралары вәкилдәрен тәүҙә “Киләсәк образы” яуаплылығы сикләнгән йәмғиәте ҡабул итте. Ул – үҙенсәлекле бөтә Рәсәй мәғариф проекты. Йәмғиәт яҡын киләсәктә илдең сәнәғәт предприятиеларында кадрҙарға мохтажлыҡты кәметеү бурысын ҡуя. “Киләсәк образы” проектын Айгөл Шадрина ойошторған һәм уны тормошҡа ашырыуға етәкселек итә. Проектҡа ярашлы, предприятиеларға мәктәп уҡыусылары менән комплекслы эш алып барырға ярҙам итәсәк форматтар булдырыла һәм һынап ҡарала. Программа Рәсәйҙең 20 төбәген, 200 сәнәғәт ҡалаһын үҙ эсенә алған, унда ҡатнашыуға 18 560 үҫмер, аныҡ һәм тәбиғи фәндәр буйынса дәрес биргән 689 уҡытыусы йәлеп ителгән. Журналистар алдында ошо программа проекттары тураһында Башҡортостандың эшҡыуарлыҡ һәм туризм министры Зөһрә Гордиенко сығыш яһаны. “Киләсәк образы” төрлө ҡатмарлыҡтағы программаларҙы тәҡдим итә. Уларҙың берәүҙәре мәктәп уҡыусыларына сәнәғәт предприятиелараның һәм төбәктәрҙең иҡтисады менән танышыу мөмкинлеге бирһә, икенселәре ниндәй һөнәр һайлаясағын яҡынса булһа ла билдәләгән үҫмерҙәрҙе күҙ уңында тота. Тимәк, теге йәки был һөнәр менән тәрәнерәк ҡыҙыҡһынырға була. Мәҫәлән, “Киләсәктәге етештереү” проекттар уйынында уҡыусылар етештереү процестары менән танышып ҡына ҡалмай, ә заводтың макетын да яһай, махсус “ҡурсаҡтар” ярҙамында унда карьера һыҙығы ла үтә ала. Бөтә был программаларҙы проект хеҙмәткәрҙәре булдыра, улар үҙ эсенә уйын методикаларын һәм мәктәптәр өсөн ярҙамсы материалдарҙы ла алған. Матбуғат туры барышында унда ҡатнашыусылар был йәмғиәт урынлашҡан студенттар кампусы биләмәһендә ошо проекттарҙы эшләгән белгестәр, программала ҡатнашҡан сәнәғәт предприятиелары һәм юғары уҡыу йорттары вәкилдәре менән танышты. Артабан журналистарҙы Кушнаренко ауылындағы “Ышаныс-К” коммерцияға ҡарамаған акционерҙар йәмғиәте ҡабул итте. Социаль эшҡыуар Айгөл Фәйзуллина етәкселек иткән был пансионат Рәсәй Федерацияһы ҡануниәтенә ярашлы мохтажлыҡ кисереүсе тип танылған граждандарға хеҙмәттәр күрһәтә. Ошо йүнәлеште күҙ уңында тотҡан проектҡа ярашлы, бөтә йәштәге һәм социаль ҡатламдағы кешеләр социаль ярҙам ала. Уларҙың төп өлөшөн оло йәштәгеләр һәм инвалидтар алып тора. Пансионат концессия системаһы нигеҙендә эшләй, йәғни бындағы урындарҙың бер өлөшө ҡаҙна иҫәбенә бирелә, икенсе өлөшөн пациенттар һәм уларҙың туған-тыумасаһы финанслай. Был йүнәлеш сағыштырмаса яңыраҡ барлыҡҡа килһә лә, социаль эшҡыуарлыҡтың ошо моделе Рәсәйҙә йылдан-йыл абруйлыраҡ була бара. Иртәгә матбуғат турында ҡатнашыусылар өсөнсө социаль эшҡыуар – “ВиЦыАн” компанияһы” яуаплылығы сикләнгән йәмғиәте – менән танышасаҡ. Ул 20 йылдан ашыу инде һаулыҡ һаҡлау учреждениелары, социаль тәьминәт һәм йортта реабилитация үтеү өсөн тауарҙар етештерә. Компанияның төп бурысы – пациенттар өсөн уңайлы мөхит булдырыу һәм медицина белгестәренең эшен еңеләйтеү. Социаль эшҡыуарлыҡ Рәсәйҙә лә, бөтә донъяла ла бизнестың абруйлы моделенә әүерелә бара. Эксперттар билдәләүенсә, был – социаль иҡтисадтың нигеҙе. Ошо төргә ҡараған эшҡыуарҙарҙың төп маҡсаты табыш алыуға ғына түгел, ә йәмғиәттең социаль проблемаларын хәл итеүгә ҡайтып ҡала. Автор фотоҺы.