Министр ҡыҙҙы яҡлап сыҡты

"Һуңғы ҡыңғырау" байрамында Башҡортостан Башлығы Радий Хәбиров менән бейегән Милана Әхмәтова тураһында күп яҙылды. Ҡайһы бер баҫмалар, һаҡһыҙ ҡыланып, ҡыҙҙы ҡыйырһытты. Милананы күп кешеләр яҡлап сыҡты, шул иҫәптән БР мәҙәниәт министры Әминә Шафиҡова ла. Уның яҙмаһы "Профессионализм, грамоталылыҡ һәм этика тураһында" тип атала. "Баҫмаларҙың береһендә «журналистар» социаль селтәрҙәге диван эксперттарының республика Башлығы Радий Фәрит улы Хәбировты һуңғы ҡыңғырауҙағы бейеүгә саҡырған ҡыҙыҡай тураһында аңлатмаларына һылтанып, уның бер ҡасан да мәктәпте тамамламауын белдерә. Шул уҡ ваҡытта колледждың (мәктәптең) үҙенсәлеге менән ҡыҙыҡһынмайҙар, яҡташыбыҙ маэстро Владимир Спиваковтың кем икәнлеген белмәйҙәр һәм уның фамилияһын дөрөҫ күрһәтмәйҙәр... Бындай баҫмаларға ышанып буламы? Был көндө сығарылыш уҡыусылары хушлашыу вальсын бейегән урта махсус музыка мәктәбе (колледжы) Рәсәйҙең ошондай һигеҙ уникаль мәктәбенең береһе булып тора. Бында беренсе кластан юғары кимәлдәге профессиональ музыканттар әҙерләнә, бөтә уҡыусылар ҙа тиерлек бөтә Рәсәй һәм халыҡ-ара конкурстарында еңеү яулай. Мәктәп академик музыканың элиталы кадрҙарын әҙерләүе менән дан тота. Миңә тап ошо мәктәптә уҡыу бәхете тейҙе. Һигеҙенсе класты тамамлағас, етди һайлап алыу турын үттек. Ике параллель кластың береһе генә уҡыуын дауам итте. Ул саҡта, 80-се йылдарҙа уҡ, беҙ 11 йыл уҡыныҡ һәм уҡыуҙы тамамлағас урта махсус белем тураһында дипломдар алдыҡ. Хәҙер яңы белем биреү программалары буйынса 10-сы йылда мәктәп уҡыусылары 1-се курс студенттары була, ә колледжды 2-се курста тамамлайҙар, урта һөнәри белем биреү учреждениеларын тамамлаусылар кеүек үк диплом алалар. Һуңғы ҡыңғырауым 1992 йылдың май аҙағына тура килде. Ул саҡта мәктәп эргәһендә ошондай матур майҙан, матур китап йәрминкәһе булманы, мәктәп тә бер бинала урынлашҡайны, беҙгә кластар етмәй ине. Бөгөнгө сығарылыш уҡыусылары күпкә уңды - мәктәптең ике корпусы һәм дөйөм ятағы бар. 2021 йылда унда булғанда Радий Фәрит улы мәктәпкә яҡындағы бинаны тапшырырға ҡушҡайны, әле уны ремонтлау буйынса эш алып барыла. Уның башланғысы менән мәктәп янында ошондай күркәм майҙансыҡ барлыҡҡа килде, ҙур китап йәрминкәһе үткәрелә. Һәм балалар Башлыҡтың һуңғы ҡыңғырау көнөндә мәктәп вальсына ҡушылыуын ғүмерлеккә хәтерендә ҡалдырасаҡ. Ә ҡыҙыҡай бик талантлы, әүҙем, Бөтә Рәсәй һәм халыҡ-ара конкурстарҙа юғары наградаларға лайыҡ булған отличник, Башҡортостан Башлығы, Владимир Спиваков фонды стипендиаты, Денис Мацуевтың оҫталыҡ дәрестәре ҡатнашыусыһы. Өфө дәүләт сәнғәт институтына уҡырға инергә йыйына. Үкенескә күрә, тормошо шулай: уның ата-әсәһе, етем һәм өләсәһе тәрбиәһендә. Республика Башлығының ҡыҙға иҫтәлекле көндә - класташтары, уҡытыусылары һәм матур йәрминкә ҡунаҡтары эргәһендә иғтибар күрһәтеүе уның өсөн ғүмерлек иҫтәлек булып ҡаласаҡ. Һәм был хәтирәләрҙә аңлау һәләте, этикаһы, белеме юҡ профессиональ булмаған «журналистарға» урын юҡтыр, моғайын..." Фото: видеонан скриншот. Сығанаҡ: https://vk.com/wall519921656_8047