Бөгөн, 21 майҙа, Өфөлә Башҡортостан Башлығы Радий Хәбиров Үзбәкстандың Наманган өлкәһе хокимы Шавкат Абдуразаков менән осрашты. Улар артабанғы хеҙмәттәшлек йүнәлештәрен, шул иҫәптән үҙ-ара сауҙа-иҡтисади хеҙмәттәшлекте киңәйтеүҙе һәм кооперация бәйләнештәрен үҫтереүҙе тикшерҙе. Радий Хәбиров Үзбәкстан менән Башҡортостандың бизнес тармаҡтарының уңышлы хеҙмәттәшлек итеүен, шулай уҡ берлектәге проекттарҙың юғары потенциалын билдәләне. – Наманган - ҙурлығы буйынса Үзбәкстандың иҡтисади йәһәттән тиҙ үҫешкән өсөнсө ҡалаһы. Төбәктәребеҙ араһындағы бәйләнештәр эшлекле, - тине Радий Хәбиров. - Еңел сәнәғәт, ауыл хужалығы һәм башҡа тармаҡтарҙа хеҙмәттәшлек итергә әҙербеҙ. Һеҙҙең килеүегеҙ мөнәсәбәттәребеҙгә яңы импульс бирер, тип ышанам. Үзбәкстандың Наманган өлкәһе хокимы Шавкат Абдуразаков төбәктең мөмкинлектәре тураһында һөйләне һәм яңы башланғыстарҙы тормошҡа ашырыу өсөн бер нисә йүнәлеш тәҡдим итте. - Ҡунаҡсыл Башҡортостанға килеүебеҙгә шатбыҙ. Уртаҡлыҡтар күп, шуға күрә үҙ-ара эш итеүҙе нығытырға ниәтләйбеҙ, - тип билдәләне Шавкат Абдуразаков. - Наманган өлкәһе Үзбәкстандың туҡыу сәнәғәте лидерҙарының береһе булып тора, шулай уҡ ауыл хужалығының йәшелсә-емеш йүнәлеше бик үҫешкән. Конкрет проекттар иҫәбендә яҡтар Өфөлә Сауҙа йорто асыу мөмкинлектәрен тикшерҙе, унда, атап әйткәндә, Үзбәкстандан туҡыма һатыласаҡ. Бынан тыш, төбәктәр араһында туристик хеҙмәттәшлекте ойоштороуҙың мөһимлеген билдәләнеләр. Осрашыу йомғаҡтары буйынса журналистар менән әңгәмәлә Башҡортостан Башлығы Радий Хәбиров Наманган өлкәһе менән хеҙмәттәшлекте үҫтереү пландары хаҡында һөйләне. – Беҙҙең республика Үзбәкстандан продукцияны Бөтә Рәсәйгә оҙатырлыҡ хаб булырға әҙер. Бынан тыш, беҙ сит ил инвесторҙарына Башҡортостан биләмәһендә агросәнәғәт комплексы өлкәһендәге проекттарҙы тормошҡа ашырырға тәҡдим итәбеҙ. Еңел сәнәғәт өлкәһендәге тәҡдимдәр ҙә ҡыҙыҡлы, беҙҙә Сауҙа йортон асыуға булышлыҡ итергә әҙербеҙ, – тип хәбәр итте Радий Хәбиров. Фото: glavarb.ru