Сунтаар үөрэнээччилэрэ Москваҕа «Саха волонтердарыгар» ыалдьыттаатылар

СПТЛ-И, гимназия үөрэнээччилэрэ, волонтер уонна А.Н. Попова кэргэнин кытары

Бу күннэргэ Москва куоракка Сунтаар улууһун оҕолоро XXXII Бүтүн Россиятааҕы «Первые шаги в науке» диэн конференцияҕа кытталлар.

Конференция ахсынньы 12-14 күннэригэр «Конгресс» киинигэр тэриллэр. Дойду тэбэр сүрэҕэр – Москваҕа Сахабыт сирин ыраах тыа нэһилиэктэриттэн — Сунтаар улууһун Туойдааҕыттан, Дьаархантан, Сунтаардааҕы оҕо дьоҕурун сайыннарар киин, СПТЛ-И, гимназия үөрэнээччилэрэ эрдэттэн бэлэмнэнэн, кыһаллан-мүһэллэн оҥорбут бырайыактарынан кытталлар.

Конференцияҕа кытталларын таһынан оҕолор Москва кэрэ бэлиэ сирдэринэн, быыстапкалрынан о.д.а сылдьан сэргэхсийэллэр.

Ону тэҥэ анаан-минээн биир дьоһуннаах соруктарын толордулар. Ол курдук, оҕолор ахсынньы 11 күнүгэр Саха сирин бастайааннай бэрэстэбиитэлистибэтигэр «Саха волонтердара» хамсааһын бэрэстэбиитэлин Аина Храмованы кытта көрүстүлэр. Үөрэнээччилэр, төрөппүттэр, учууталлар бэйэлэрэ оҥорбут бэлэхтэрин уонна улууспут «Сунтаар сонуннара» хаһыатын туттардылар. Бу кэһиилэрин, бэлэхтэрин госпитальга эмтэнэ сытар Саха сирин байыастарыгар тиксэриэхтэрэ. «Саха волонтердара» хамсааһын бэрэстэбиитэлэ Аина Виссарионовна: «Быйыл Саха сириттэн оҕолору кытта кэлбит бастакы ыалдьыттар, эһиги, сунтаардар» диэн бэлиэтээн эппитэ оҕолорго, салайааччыларыгар ордук долгутуулаах буолла.

Үөрэнээччилэр волонтеры кытары

А.Н. Попова уонна волонтер

Улахан таһымнаах конференцияҕа дакылаат көмүскүү, «Саха волонтердарга» дьоһун соруктаах тиийбит уерэнээччилэр — Тимофеева Василина, 6-с кылаас Дьаархан, Попова Милана 5-с кыл., Иванова Сайаана 6-с кыл. — Сунтаардааҕы гимназия, Иванова Майя 6-с кыл. — Сунтаардааҕы политехническай лицей уонна Туойдаахтан Ераскумов Эрхан 7-с кыл., Ераскумов Никита 6-с кыл. үөрэнээччилэрэ.

Оҕолор Москваҕа сырыыларын туһунан өссө даҕаны биһиэхэ суруйан сырдатыахтара. Оҕолорбутугар ситиһиилэри баҕарабыт!

Юлия-Айархаана АЛЕКСЕЕВА