Бер ейәненә – велосипед, компьютер, икенсеһенә кәнфит тә юҡ...

Ирек олатаһын район үҙәгенә дауаханаға алып китеп бара. Нисек ныҡ баҫып йөрөй ине бит! Ғүмер буйы ауырымаған, дауаханаға барып та ҡарамаған олатаһы 70-те уҙғас биреште. Хәҙер өй тирәһендә лә таяҡҡа таянып ҡына йөрөй. Ныҡ һыҙланғас, бөгөн эшенән һорап булһа ла ҡартатаһын дауаханаға алып китте. Олатаһы Иректең ике туғаны Раяндың ғаиләһе менән йәшәй. Йортон да, бөтә булған байлығын да уға яҙҙырған. Ғүмер буйы Раян тип үлә яҙып торҙо. Әйтерһең дә башҡа ейән-ейәнсәрҙәре юҡ. Ләкин Раян ғына эшкинмәгән, яуапһыҙ булып үҫте, әлеге көндә ауылда эшһеҙ ята. Сәбәбе - эскегә әүәҫлеге. Был ғәҙәте киң таралғас, хәҙер бөтөнләй эш таба алмай. Бер ауыҙына алһа, донъяһын онота, ҡатыны менән дә шул сәбәпле һүҙгә килешә, өйҙә тыныслыҡ юҡ. Ҡыҙының улы булғанғамы икән, бәләкәйҙән ныҡ яҡын итте Раянды ҡартатаһы. Күңелен әрнеткән бер ваҡиға әле лә Иректең күҙ алдында. Раян менән Ирек ике туғандар ғына түгел, тиңдәштәр ҙә. Ирек бәләкәй генә саҡтан бөтә эштәрҙе башҡарҙы, йыраҡтағы ҡоҙоҡтан һыуын да ташыны, йорттағы барлыҡ мәшәҡәттәрҙә ҡатнашып үҫте. Ә Раян - киреһенсә. Өсөнсө класта уҡыйҙар ине. Май айында Раян мәктәпкә бөтә малайҙарҙың хыялы булған бик текә велосипедта килде. – Олатайым тыуған көнөмә бүләк итте. Иң ҡиммәтлеһен, иң ҡеүәтлеһен, – тине ул, маҡтанып. Шәп велосипедты класташтары уратып алды. Кемдер рулен тотоп ҡарай, кемдер ултырырға рөхсәт һорай. Иректең дә күҙе ныҡ ҡыҙҙы велосипедҡа. Уның да яңы ғына тыуған көнө булғайны ла бит, олатаһы хатта иҫенә лә төшөрмәне. – Раян, мәктәп ихатаһы буйлап берҙе генә велосипедыңда әйләнеп киләйем әле, – тине Ирек. – Юҡ инде, йә берәй ергә бәрелерһең. Үҙегеҙ алығыҙ велосипед, – тине малай эре генә Раянға ғына түгел, олатаһына ла шул тиклем ҙур үпкәһе ҡалғайны шунда. Бәлки миңә лә олатайым велосипед алып бирер әле, тип оҙаҡ өмөтләнеп көтөп йөрөнө. Ләкин бер йылдан да, ике йылдан да, һуңынан да өмөтө аҡланманы. Ул ваҡытта атаһы йорт һалыу мәшәҡәттәре менән булғас, үҙҙәренең аҡсаға ҡытлыҡ мәле ине. Ә Раян һәр тыуған көнө һайын шәп бүләктәре менән маҡтанды. Бер йыл магнитофонлы, һуңғараҡ компьютерлы ла булды. – Бер ҡасан да кемдәндер өмөт итмә. Был тормошта үҙеңә ышанырға кәрәк. Бер эштән дә ҡурҡмаһаң, маҡсат ҡуя белһәң, бөтә нәмәгә лә өлгәшеп була, – ата-әсәһенең был һүҙҙәре Иректең тормош девизына әүерелде. Һәм бөгөн уның барыһы ла бар: дипломы ла, эше лә, йорто ла, текә машинаһы ла, ғаиләһе лә. Теләгән нәмәһен һатып ала, теләгән еренә ял итергә сығып китә. Ҡасандыр тыуған көнөнә шоколад бүләк итергә лә аҡсаһын йәлләгән олатаһына ла хәҙер бөтөнләй үпкәһе юҡ. Сөнки тап шул арҡала ул үҙенә ышанып, сәмләнеп йәшәргә өйрәнеп үҫте... Хәтирәләргә бирелеп, район үҙәгенә килеп еткәнен дә һиҙмәне. Табипҡа күрһәткәс, олатаһын дауаханаға һалырға булдылар. - Оло кеше бит, түләүле палатаға урынлаштырығыҙ инде, тынысыраҡ булһын, - тип ейәне уңайлы палатаға һалдырҙы. Ҡиммәтле дарыуҙарын да, ашарына аҙыҡ-түлеген дә килтерҙе. - Олатай, иртәгә эштән һуң килермен хәлеңде белергә. Дауаханан сыҡҡас, үҙемә ҡайтырһың. Һиңә хәҙер тыныслыҡ һәм матур тәрбиә кәрәк, – тип олатаһының арҡаһынан яратып ҡайтып китте. Оҙатырға сыҡҡан олатаһының күҙендә йәштәр күренде... Ейәненә ҡарата рәхмәт тә, заманында Иреккә күрһәтмәгән иғтибары өсөн үкенеү йәштәре лә ине улар. Д. Ишморатова фотоһы.