Хәҙер Ағиҙел ҡалаһы ҡатын-ҡыҙҙары маммографияны заманса ҡорамалда үтә ала. Ҡала поликлиникаһына ул “Һаулыҡ һаҡлау” милли проектының тәүге звеноны яңыртыу программаһына ярашлы алынды. Олоғайған һайын ҡатын-ҡыҙҙарҙа һөт биҙҙәре яман шеше сирҙәре барлыҡҡа килеү хәүефе арта. Пациент ни тиклем өлкәнерәк, сир башланыу хәүефе лә шунса юғары. Клиник онкология осраҡтарының өстән бер өлөшө 40-49 йәшлек ҡатындарға тура килә. Патологик үҙгәрештәрҙең етди сирҙәргә барып олғашмауы өсөн ваҡытында тикшереү үтергә кәрәк.Был һауығыуға мөмкинлектәрҙе икеләтә арттыра. Айырыуса нәҫелдән килгән күсәгилешлеккә иғтибар итегеҙ, ти табиптар.Онкологтар ҡатын-ҡыҙҙарға даими рәүештә тикшерелергә ҡуша. – Беҙ ҡатын-ҡыҙҙарыбыҙҙың диспансерлаштырыуға йышыраҡ килеүен теләйбеҙ. Яңы маммографта диагностика ла теүәлерәк буласаҡ, – ти поликлиника мөдире Нурия Бәшәрова. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: Һаулыҡ һаҡлау министрлығының матбуғат хеҙмәте.