Башҡортостан Белгород өлкәһенән 500 баланы ҡабул итәсәк. Был турала бөгөн Хөкүмәттең аҙналыҡ оператив кәңәшмәһе ваҡытында Башҡортостан Башлығы Радий Хәбиров хәбәр итте. – Мин Белгород өлкәһе губернаторы менән һөйләштем. Улар беҙгә балаларҙы ҡабул итеүҙә ярҙам һорап мөрәжәғәт итте. Белеп тораһығыҙ, уларҙа хәлдәр ҡатмарлы. Шуға күрә беҙ Белгород өлкәһенән 500 баланы ҡабул итәсәкбеҙ,– тине ул. Радий Фәрит улы әйтеүенсә, был эш менән Илеш районы һәм Стәрлетамаҡ ҡалаһы шөғөлләнәсәк. Балалар ошо төбәктәргә юлланасаҡ. – Мин был муниципалитеттарҙың хакимиәт башлыҡтарына ныҡлы әҙерләнергә ҡушам. Балалар йонсоп киләсәк, уларҙа көн һайын шартлау тауыштары яңғырай, кешеләр үлә, – тине Радий Хәбиров. – Иң өһиме – йәшәү, туҡланыу, уҡыу процесын яйға һалыу, мохтажлыҡ булһа – өҫтәмә белем биреүҙе ойоштороу. Балалар республикабыҙҙың икенсе йорттары икәнлеген тойорға тейеш, эште тейешле кимәлдә ойоштороғоҙ. Был ялдарҙа билдәле булыуынса, Башҡортостан Хөкүмәте Премьер-министрының беренсе урынбаҫары Азат Бадранов приказға ярашлы махсус хәрби операция биләмәһенән ҡайтты һәм Хөкүмәттә эшен дауам итә. Бөгөн Азат Шамил улы аҙналыҡ кәңәшмәлә ҡатнашты. Башҡортостан Башлығы Радий Хәбиров уны сәләмләне һәм хеҙмәте өсөн рәхмәт әйтте. “Һеҙҙе күреүебеҙгә шатбыҙ һәм хеҙмәтегеҙ өсөн рәхмәт әйтәбеҙ. Һеҙ яу яланында һәм беҙҙең подразделениелар менән мөнәсәбәттәрҙе көйләү буйынса бик күп эш башҡарҙығыҙ. Беҙҙең бөтә яугирҙәр ҙә һеҙҙең турала тик йылы һүҙҙәр әйтә. Бындағы эшмәкәрлегегеҙ буйынса тулы функционалды саҡ ҡына һуңғараҡ билдәләрбеҙ. Һис шикһеҙ, башлыса, республиканың дәүләт власы органдары менән хәрби подразделениелар етәкселеге һәм хәрбиҙәр араһында эшмәкәрлекте көйләү менән шөғөлләнерһегеҙ”,– тине ул. Алдан хәбәр итеүебеҙсә, Азат Бадранов махсус хәрби операция биләмәһендә 2022 йылдың 10 ноябренән алып хеҙмәт итте. Шулай уҡ Радий Хәбиров күрше Ырымбур өлкәһенә ярҙам итеү мәсьәләһен күтәрҙе. Билдәле булыуынса, Орск ҡалаһындағы һыуһаҡлағыста тупраҡ дамба йырылыуы арҡаһында төбәк ташҡындан зыян күрә. Әлеге ваҡытта 3,9 мең йорт һәм 8,7 мең баҡса участкаһы һыу аҫтында ҡалған. 6,1 мең кеше эвакуацияланған. Башҡортостан Башлығы Хакимиәте етәксеһе Максим Забелин хәбәр итеүенсә, кисә Башҡортостан Ырымбур өлкәһенә эсәр һыу партияһын ебәргән. Бөгөн тапшырыу өсөн тағы бер партия һыу һәм еүеш салфеткалар әҙерләйҙәр. Башҡортостан Башлығы Радий Хәбиров күршеләргә бөтә кәрәкле нәмә менән ярҙам итергә ҡушты. – Улар беҙҙең күршеләр, ауыр хәлдә ҡалдылар. Тимәк, уларға ярҙам итергә кәрәк. Нимә һорайҙар – шуны ебәрегеҙ. Беҙҙә бөтә нәмә лә бар. Һыу кәрәк икән – һыу ебәрегеҙ. Был эштә шифаханалар беҙгә ярҙам итһен, – тине Радий Хәбиров. Фото: "Башинформ".