Бөрө футболсылары Түбәнге Новгородта "Демография" милли проектының "Спорт - йәшәү нормаһы" федераль проекты сиктәрендә үткән "Мини-футболды мәктәпкә" бөтә Рәсәй ярыштары финалының бронза призеры булды. Ярышта дүрт дивизионда 64 команда ҡатнашты. Башҡортостандан турнирҙа футбол буйынса тренер, "Йәйғор" үҙәгенең өҫтәмә белем биреү уҡытыусыһы Диана Сарванова һәм физкультура уҡытыусыһы Екатерина Гордеева етәкселегендәге Бөрө ҡалаһының 8-се мәктәбе командаһы сығыш яһаны. Республика этабында яҡшы һөҙөмтәләр күрһәтеп, спортсылар финал уйындарына юлланды. Башта уйындар төркөм этабында башланды. Бөрөләр Омск (3:0), Бүрәт Республикаһы (2:1), Санкт-Петербург (8:0) командалары менән осрашты. Бөтә осрашыуҙарҙа ла бер һүҙһеҙ еңеүҙәр яуланды. Беренсе урындан матчҡа Мурманск командаһы сыҡты. Уны 1:0 иҫәбе менән еңеп, ярымфиналда Хабаровск командаһына ҡаршы сыҡтылар. Көсөргәнешле уйынға ҡарамаҫтан, беҙҙең ҡыҙҙар буласаҡ турнир чемпиондарынан 2:1 иҫәбе менән еңелделәр. Калуга өлкәһенең Кондрово ҡалаһы командаһы менән өсөнсө урын өсөн матчта 2:0 иҫәбе менән миҙалдарҙы тартып алыуға өлгәштеләр – Был спортсыларыбыҙ өсөн иҫ киткес һәм файҙалы аҙна булды. Мәктәп менән ҡала ғына түгел, тотош Башҡортостан намыҫы өсөн көрәштеләр. Беҙгә етди яуаплылыҡ йөкмәтелде. Ҡыҙҙар быны тойҙо һәм бик борсолдо. Әммә, шуға ҡарамаҫтан, үҙҙәрен лайыҡлы күрһәттеләр. Тәрбиәләнеүселәрем менән ғорурланам! Ата-әсәләргә ошондай етди турнирҙа үҙҙәрен һынап ҡарау мөмкинлеге өсөн рәхмәт белдерәм. Өлгәшелгәндәр менән генә туҡтап ҡалмайбыҙ, тағы ла ҙурыраҡ еңеүҙәргә ынтылабыҙ. Хаталарҙы тикшерербеҙ һәм турнирҙың төп бүләген ала алырбыҙ, тип ышанам, – тип билдәләне тренер Диана Сарванова. Билдәле булыуынса, “Демография” (национальный проект “Демография”) милли проекты Рәсәй Президенты Владимир Путиндың май указы менән булдырылды. Фото: Бөрө районы хакимиәте.