Өфөлә Ҡариҙел йылғаһы аша һалына башлаған күперҙең әҙерлеге бөгөнгә 25 процент тәшкил итә. Был төҙөлөш Рәсәй Президенты Владимир Путиндың май указдарына ярашлы ҡабул ителгән “Хәүефһеҙ сифатлы юлдар” милли проекты (национальный проект «Безопасные качественные дороги») нигеҙендә алып барыла. Подряд ойошмаһы таяуҙар араһындағы балкаларҙы ҡорҙо, яҡтыртыу бағаналарын урынлаштырҙы, әлеге ваҡытта ошо таяуҙарҙы йыһазландырыу бара. Эш барышын “Рәсәй юл ғилми-тикшеренеү институты” федераль учреждениеһы контролдә тота. “Контроль заманса лаборатория аппараттары ярҙамында башҡарыла. Эшкә аҙналыҡ мониторинг яһайҙар, матди һәм хеҙмәт ресурстарының ниндәй хәлдә булыуы, графиктың күҙәтелеүе лә тикшерелә”, – тип аңлаталар Башҡортостандың Транспорт һәм юл хужалығы министрлығында. Оҙонлоғо 444 метр булған был күпер 2019 йылда авариялы тип танылғайны, шуға уны яңыртып һалырға ҡарар ителде. Күпер 2025 йылда әҙер булырға тейеш. Төҙөлөш буйынса килешеү хаҡы 2,16 миллиард һум тәшкил итә. Фото: “Башинформ”.