Бәләкәй принцессаларға бәхет бүләк иттеләр

5 мартта Өфөлә бишенсе тапҡыр үткәрелгән “Бәләкәй принцессалар балы” уҙҙы. Баш ҡалалағы Башҡорт дәүләт опера һәм балет театрына тотош республиканан һаулыҡ мөмкинлектәре сикләнгән ҡыҙҙар – барлығы 288 бала килде. Улар араһында етем ҡыҙҙар һәм махсус хәрби операцияла ҡатнашҡандарҙың балалары бар ине. Башҡортостан Башлығы Радий Хәбиров балда ҡатнашыусыларҙы тәбрикләне һәм уларҙың әсәйҙәрен Халыҡ-ара ҡатын-ҡыҙҙар көнө менән ҡотланы. Бәләкәй принцессалар өсөн байрам театр фойеһынан башланды. Уларҙың һәр береһен әкиәт персонаждары ҡаршыланы, улар ролендә аниматорҙар һәм артистар сығыш яһаны. Артабан балаларҙы ҡыҙыҡлы программа - ижади күргәҙмәләр, оҫталыҡ дәрестәре, фото төшөү зоналары һәм байрамса биҙәлгән бал көтә ине. Башҡортостан Башлығы Радий Хәбиров сарала ҡатнашыусыларға: - Бәләкәй, сибәр принцессалар, ҡәҙерле әсәйҙәр, өләсәйҙәр! Ай башында яҙҙың иң төп байрамын – 8 Мартты көтәбеҙ. Барығыҙға ла иң изге теләктәр, бәләкәй принцессаларға бәхет теләйем. Һеҙ аҡыллы, матур, һәләтле һәм бик көслө. Ә ата-әсәләргә ихтыяр көсө, сәләмәтлек, именлек теләйем, йорттарында шат көлөү, йылмайыу һәм бәхет булһын. Һәм иң мөһиме – балаларыбыҙ сирләмәһен. Бәхетле булығыҙ, - тине. Ҡотлау һүҙҙәренә “Бәхет биләмәһе” хәйриә фондының попечителлек советы рәйесе Каринэ Хәбирова ҡушылды. Тап ошо фонд ярҙамы менән “Бәләкәй принцессалар балы” үткәрелә. - Һеҙ байрамға шул тиклем матур, бәхетле һәм йылмайып киләһегеҙ. Әсәйҙәрегеҙ ҙә шундай матур. Бөгөн театрыбыҙ сихри һарайға әүерелде, унда барлыҡ хыялдар тормошҡа аша. Иң сихри хыялығыҙ тормошҡа ашһын. Күберәк йылмайығыҙ һәм ҡояшлы көндәр теләйем, - тине Каринэ Хәбирова. Башҡортостан Башлығы хәйриәселәр менән дә осрашыу үткәрҙе. Улар байрам балын ойоштороуҙа ярҙам күрһәтте. Радий Хәбиров уларға байрамды әҙерләүҙә ярҙам күрһәткәндәре һәм даими эш алып барғандары өсөн рәхмәт әйтте. Журналистар менән һөйләшкәндә төбәк етәксеһе Башҡортостанда Һаулыҡ мөмкинлектәре сикләнгән кешеләр тураһында хәстәрлек йылында үҙенсәлекле кешеләргә иғтибар һәм хәстәрлек бүлеү мөһимлеге тураһында белдерҙе. - Беҙ көндәлек мәшәҡәттәр араһында эргәбеҙҙә ошондай үҙенсәлекле кешеләрҙең барлығын һиҙмәйбеҙ. Уларҙың кемеһелер ишетмәй, кемеһелер күрмәй, кемдер түшәктә ята. Һәм дөйөм маҡсатыбыҙ – йәмғиәттең ҡарашын ошондай кешеләргә йүнәлтеү. Уларға беҙгә ҡарағанда ауырыраҡ, йыш ҡына уларға иғтибар һәм ярҙам – изге эштәр һәм изге һүҙҙәр кәрәк. Тағы нимәләр мөһим? Көсөбөҙҙө талап иткән мәсьәләләрҙең хәл ителеүенә этәргес бирергә теләйбеҙ. Һаулыҡ мөмкинлектәре сикләнгән кешеләр менән эш итеү буйынса эштең норматив базаһын ҡайтанан ҡарамаҡсыбыҙ, планлаштырылған эштәргә аҡса бүлеүҙе өҫтәрбеҙ. Был хисле мәлдәрҙән тыш, аныҡ проекттарҙы тормошҡа ашырасаҡбыҙ. Улар үҙенсәлекле балалар тормошон яҡшыраҡ һәм уңайлыраҡ итәсәк, - тине Радий Хәбиров. Сығанаҡ, фото: glavarb.ru/rus/press_serv/novosti/175616.html