Етәксенең эш тәжрибәһе байтаҡ, ул был поста 2004 йылдан бирле эшләй. ”Урындағы башланғыстарҙы хуплау” программаһы Көйөргәҙе районында ҙур һорау менән файҙалана. Миҫалға, 2017 йылда - ун ике ауыл биләмәһе, 2018 йылда иһә ете ауыл биләмәһе еңеп сыҡҡан. “Иң сағыу проекттарға республика ярҙам итә, уларҙы тормошҡа ашырырға сығымдың бер өлөшөн бүлә. Ҡалған аҡса - муниципалитеттан, бағыусыларҙан һәм халыҡтың үҙенән”, - ти етәксе. Әхәт Әхтәм улы әйтеүенсә, декабрҙә төбәктең фәнни-белем биреү үҙәге идара итеүсе компанияһы үткәргән уҡыуҙарҙа унике ауыл хакимиәте биләмәһе башлығы ла ҡатнашҡан. Иң мөһим факторҙарҙың береһе - документтарҙы дөрөҫ, грамоталы тултырыуға ҙур иғтибар бүлеү кәрәк. Икенсе момент – халыҡтан аҡса йыйыу. Урындағы етәкселек халыҡ менән һөйләшә, берҙәм фекергә килергә тейеш. “Яңы эш башлағандарға үрнәк итеп Бахмут, Керәүле- Илюшкин, Свобода, Яҡшымбәт ауыл биләмәләре хакимиәт башлығы вазифаһында оҙаҡ йылдар эшләгән, яуаплы, иғтибарлы, әйткән һүҙендә тора, башлаған эште аҙағына еткерә белгән Нурия Нуриман ҡыҙы Шәрипованы, Эльза Сәмиғулла ҡыҙы Васильеваны, Сания Миңлеәхмәт ҡыҙы Сәйетбатталованы, Рәүеф Тимерхан улы Абдуллинды килтерергә мөмкин”, - ти Әхәт Әхтәм улы. Ауылдарҙа бөгөн инициатив төркөмдәр әүҙем эш алып бара, программаға ярашлы бик күп саралар үткәрелә, улар мәҙәниәт хеҙмәткәрҙәре, мәктәп, балалар баҡсаһы коллективтары, старосталар ойоштороуы ярҙамында төрлө конкурстар, мәҙәни-ағартыу саралары алып барыла. Ауыл халҡы ниәт иткән эштәр быйыл да тормошҡа ашыр тигән ышаныста ҡалабыҙ.