Өфө университетына телһөйәр балалар йыйылды

Бөгөн, 1 мартта, Өфө фән һәм технологиялар университетында Рәсәй халыҡтарының туған телдәре һәм әҙәбиәттәре буйынса уҡыусыларҙың III Федераль олимпиадаһының йомғаҡлау этабы үтте. Уҡыусыларҙың төньяҡ-көнсығыш олимпиадаһы (СВОШ) тип аталған бәйгегә ярашлы башҡорт теленән дә 8-11-се класс уҡыусылары өсөн олимпиада ойошторолоп килә. Сараны Өфө университетының башҡорт филологияһы, шәрҡиәт һәм журналистика факультеты ойоштора. Иң тәүҙә шуны әйтергә кәрәк: был бәйге Уҡыусыларҙың 2023-2024 уҡыу йылындағы олимпиадалары исемлегенә индерелгән. Шул нигеҙҙә уның еңеүселәре һәм призерҙары профилле йүнәлештәргә уҡырға ингәндә льготалар менән файҙалана ала: уҡырға имтиханһыҙ инеү йәки БДИ өсөн 100 балл йыйған кешеләргә тиңләштерелеү (рус теле буйынса БДИ 75 балдан кәм булмаҫҡа тейеш). Олимпиада дипломдары дүрт йыл ғәмәлдә була. Олимпиадала башҡорт телен туған тел һәм дәүләт теле булараҡ өйрәнгән уҡыусылар ҡатнаша ала. Олимпиада уҡыу йортоноң тантаналар залында асылды. Фойела “Китап” нәшриәте продукцияһы һәм башҡорт милли биҙәүестәре тәҡдим ителгән күргәҙмә эшләне. Быйылғы олимпиадала 809 уҡыусы ҡатнашырға теләк белдергән. Уларҙың 363-ө һайлап алыу этабын уңышлы үтеп, II турға сыҡҡан. Олимпиадала ҡатнашыусыларҙы Рәсәй Федерация Советының Фән, мәғариф һәм мәҙәниәт буйынса комитеты рәйесе Лилиә Ғүмәрова тәбрикләне. - Федерация советы, шул иҫәптән беҙҙең комитет, туған телдәрҙе һаҡлауға ҙур иғтибар бүлә. Әлеге олимпиада ла, Төньяҡ-көнсығыш федераль университеттың тәҡдименә ярашлы, Федерация советының ярҙамы менән ойошторола. Быйыл унда 44 туған тел буйынса 9600-ҙән ашыу уҡыусы ҡатнаша. Башҡортостан уҡыусыларының да ошо бәйгелә әүҙем ҡатнашыуы ҡыуандыра, - тип билдәләне Лилиә Салауат ҡыҙы. Уҡыусыларға һәм уларҙы әҙерләгән башҡорт теле һәм әҙәбиәте уҡытыусыларына Өфө фән һәм технологиялар университеты проректоры Илгиз Ҡәҙерғолов, БР мәғариф һәм фән министры урынбаҫары Әлфиә Ғәлиева, Башҡортостан Башлығы Хакимиәтенең ижтимағи-сәйәси идаралығы кәңәшсеһе Рөстәм Баянов, БР Мәғарифты үҫтереү институты ректоры Әлфис Ғаязов, ӨФТУ-ның башҡорт филологияһы, шәрҡиәт һәм журналистика факультеты деканы Гөлфирә Абдуллина сәләмләп, уларға уңыштар теләне. Гөлфирә Риф ҡыҙы уҡыусыларға бик яҡшы яңылыҡ еткерҙе: быйыл ошо олимпиадала еңеү яулап, ӨФТУ-ның башҡорт филологияһы, шәрҡиәт һәм журналистика факультетына уҡырға ингән студенттарға беренсе курс дауамында 58 мең һум стипендия түләнәсәк. Артабан уҡыусылар олимпиада һынауҙарын үтәүгә юлланды. Ә уларҙың етәкселәре – башҡорт теле һәм әҙәбиәте уҡытыусылары өсөн семинар ойошторолдо. Ул “Һәләтле балаларҙың ижади фекерләүен үҫтереүҙең инновациялы алымдары” тигән темаға арналды. Үрҙә әйтеп үтеүебеҙсә, был олимпиада телһөйәр уҡыусыларға яңы мөмкинлектәргә юлдар аса. Беҙ сара барышында ҡатнашыусылар һәм уларҙың етәкселәре менән әңгәмәләшергә лә форсат таптыҡ. Сибай ҡалаһының Р. Өмөтбаев исемендәге башҡорт лицейының башҡорт теле һәм әҙәбиәте уҡытыусыһы Айһылыу Моталлапова ике уҡыусыһы – Әлмира Ҡаҙаҡбаева һәм Айзилә Әминева менән килгән. Ҡыҙҙар – икеһе лә уҡыу алдынғыһы. Әлмира быйыл Төбәк-ара башҡорт теле һәм әҙәбиәте буйынса олимпиадала ла еңеү яулаған. Айзилә – лицейҙың уҡыусылар үҙидараһының президенты. - Тел нескәлектәрен өйрәнеү оҡшай, киләсәк һөнәребеҙҙе филология йүнәлеше буйынса һайларға тигән уйыбыҙ ҙа бар, - тине ҡыҙҙар. Бөрйән районының Иҫке Собханғол урта мәктәбе уҡыусыһы Илтимер Мырҙағолов та – уҡыу алдынғыһы, бейеүсе, төрлө ижади конкурстар еңеүсеһе. - Илтимер – ныҡ һәләтле егет. Яңыраҡ ҡына “Байыҡ” телевизион бейеү конкурсында яңғыҙ бейеү номинацияһында уңышлы сығыш яһап, киләһе турға үтеп ҡайтты. Теле шул тиклем бай, рухлы бала. Киләсәктә ҙур кеше булыуын, халҡыбыҙға лайыҡлы хеҙмәт итеүен теләйем, – тине уҡытыусыһы Резеда Сәғитова. Баймаҡ районы Әбделкәрим ауылы мәктәбенең башҡорт теле һәм әҙәбиәте уҡытыусыһы Вазифа Мостаева уҡыусыһы Айзилә Алсынованы олимпиадаға әҙерләгән. - Олимпиадаға ҙур өмөт-ышаныс менән килдем. Әлбиттә, тулҡынланам. Филолгия йүнәлеше буйынса уҡырға инергә теләгем ҙур, - тине Айзилә. Автор фотолары.