Матбуғат йортон яңырыу көтә

23 ғинуарҙа Өфөлә Башҡортостан Башлығы Радий Хәбиров Матбуғат йортонда булды. Төбәк етәксеһе бинаның техник торошо, журналистарҙың эш шарттары менән танышты һәм типография цехтарын ҡараны. Матбуғат йорто 1972 йылда асылған. Бында “Башҡортостан Республикаһы” нәшриәт йорто составына ингән 22 республика ваҡытлы матбуғат баҫмаһы редакциялары урынлашҡан. 2024 йыл башына уларҙың дөйөм уртаса тиражы 54 мең дана тәшкил итә. Редакция-нәшриәт корпусында 480 белгес эшләй. Башҡортостан Башлығы журналистарҙың эш кабинеттарын ҡараны һәм йәш белгестәр менән аралашты. Республиканың Матбуғат һәм киң мәғлүмәт саралары агентлығы етәксеһе Максим Ульчев һөйләүенсә, ярты быуат эсендә бинала бер тапҡыр ҙа капиталь ремонт яһалмаған. Редакциялар бүлмәләренең планировкаһы ҡулай түгел, ә көҙгө-ҡышҡы осорҙа иҫке тәҙрәләр арҡаһында кабинеттарҙа һыуыҡ була. Матбуғат йортоноң инженер селтәрҙәре лә ныҡ туҙған. “Башҡортостан Республикаһы” нәшриәт йортоноң генераль директоры вазифаһын башҡарыусы Рәсүл Сәфәрғәлиев һәм Матбуғат һәм киң мәғлүмәт саралары агентлығы етәксеһе Максим Ульчев төбәк Башлығын яңыртылған Матбуғат йорто концепцияһы менән таныштырҙы. Хәтерегеҙгә төшөрәбеҙ, 2021 йылдың апрелендә “Медиайыйын” беренсе милли киң мәғлүмәт саралары форумы ултырышында Башҡортостан Башлығы Радий Хәбиров Өфөләге Матбуғат йортон капиталь ремонтлауҙың дизайн-проектын әҙерләргә ҡушҡайны. – 2024 йылда Матбуғат йортон капиталь ремонтлауға проект-смета документацияһын әҙерләйбеҙ. Был маҡсатҡа республика бюджетынан һеҙҙең ҡушыуығыҙ буйынса 6,8 миллион һум алдыҡ, – тине Максим Ульчев. Төҙөлөш-ремонт эштәрен 2025 йылға башларға ниәтләйҙәр. Улар бинаның тышҡы яғын, эске яғын биҙәүҙе, инженер коммуникацияларын алмаштырыуҙы күҙ уңында тота. Шулай уҡ бында яңы ашхана, тамашалар залы, матбуғат үҙәген асыу планлаштырыла. – Заманса төҙөлөш материалдары бинаның тышҡы ҡиәфәтен күркәмләндерәсәк, ә кабинеттар һәм цехтар эшләү өсөн уңайлы буласаҡ, – тип билдәләне Максим Ульчев. – Был технологик процестарҙы ҡыҫҡа ваҡыт эсендә һәм энергия сығымдарын әҙерәк сарыф итеп башҡарырға мөмкинлек бирәсәк. Башҡортостан Башлығы Радий Хәбиров Матбуғат йортоноң типография комплексы менән дә танышты. Унда республикалағы бөтә баҫмаларҙың 80 процент тиражы сығарыла. Төбәк етәксеһе гәзит-журналдар матбуғаты цехтарын ҡараны, хеҙмәткәрҙәр менән аралашты. Улар ҡорамалдарҙың күпселеге ныҡ туҙыуы һәм алмаштырыуҙы талап итеүе хаҡында һөйләне. Был, етештереү һөҙөмтәлелеген арттырып, типография комплексын комплекслы модернизациялау кәрәклеген билдәләй. Радий Хәбиров республиканың Матбуғат һәм киң мәғлүмәт саралары агентлығына типография комплексын яңыртыу проектын әҙерләргә һәм уны “Инвестиция сәғәте”ндә күрһәтергә ҡушты. Шул уҡ көндө Өфөнөң Матбуғат йортонда Башҡортостан Башлығы дәүләт һәм муниципаль баҫмаларҙың баш мөхәррирҙәре менән осрашты. Фото: Башҡортостан Башлығы сайты.