Балаҡатай районының Үҙәк моделле китапханаһында “Һанлы белем донъяһына” клубы күнекмәләре үтте. Сара "Демография" милли проекты маҡсаттарына ярашлы уҙғарылды. Оло кешеләрҙә ноутбук, планшет йәки смартфон менән эшләү, Интернетта эшләү буйынса белем һәм оҫталыҡ тәрбиәләү – клубтың төп маҡсаты. Улар дәүләт һәм муниципаль хеҙмәттәрҙе алыу өсөн кәрәк, уларҙың төп өлөшө бөгөн электрон төрҙә бирелә. “Дәүләт хеҙмәттәре: эш алгоритмы”, “Табипҡа яҙылыу” ҡушымтаһында эш” исемле сираттағы дәрестә китапханасылар дәүләт хеҙмәттәрендә иҫәп яҙмаларын нисек булдырырға, ҡулланыусыларҙың шәхси кабинеттарын тергеҙергә өйрәтте. Шулай уҡ мобиль ҡоролмаларға “Табипҡа яҙылыу” ҡушымтаһын ҡуйырға тәҡдим ителде. Сара файҙалы булды, йыйылыусыларҙың барыһы ла ҡәнәғәт ҡалды. Клубта ҡатнашыусылар ҙур ҡыҙыҡһыныу һәм дәрт менән белем алды, сөнки уларҙың һәр береһенең компьютер грамотаһы серҙәренә төшөнөү өсөн сәбәптәре етерлек. Берәүҙәрҙең – Дәүләт хеҙмәттәре порталында теркәлеү һәм үҙаллы табипҡа яҙылыу, икенселәрҙең – һалым хеҙмәтенә һорау ебәреү, пошлинаны түләү теләге. "Хәҙерге заман кешеһенең тормошон компьютер технологияларынан тыш күҙ алдына килтереп булмай, өлкән йәштәгеләр йәш быуындан ҡалышырға теләмәй, улар заман менән бергә атларға тырыша. Улар өсөн компьютерҙа эшләү тормошҡа яңы мәғәнә биреү, аралашыу даирәһен киңәйтеү, йәшәү сифатын күтәреү ысулы”, - тип билдәләнеләр клубты ойоштороусылар. Билдәле булыуынса, “Демография” (национальный проект “Демография”) милли проекты Рәсәй Президенты Владимир Путиндың май указы менән булдырылды. Фото: Балаҡатай районы хакимиәте.