Был юлы Гөлназ Ишемғолованан балыҡ бешереү рецебы. "Үпкәләйбеҙ...Туғандарға, һөйгән йәребеҙгә, күршеләргә йә бөтөнләй таныш булмаған кешеләргә. Сәбәпле лә, сәбәпһеҙ ҙә килеш. Тик бер нәмәне аңлап етмәйбеҙ. Йә аңларға теләмәйбеҙ...Үпкәне ғүмер дауамында йөк итеп һөйрәп йөрөтөп үҙебеҙгә үк зыян яһағанды. Эскә йотолған үпкәнең ауырыу булып тышҡа сыға торған алама холҡо бар бит. Әйҙәгеҙ, бөгөндән был яман ғәҙәттән баш тартайыҡ! Үпкәләп йөрөүҙән, үпкәсел булыуҙан өҫтөн булайыҡ, күңел тыныслығын һаҡларға, мәлендә матур итеп аңлашырға өйрәнәйек. Үпкәләшмәйек! Бер-береңдең күңелен аяп йәшәүгә ни етә?! Бәлки, һеҙҙе үпкәләткән кеше күптән нимә әйткәнен онотҡандыр, һеҙ ҙә үпкәгеҙҙе ҡәҙерләп бәпләп йөрөткәнсе, онотоғоҙ ҙа ҡуйығыҙ! Шулай рәхәт буласаҡ! Ысын әйтәм... Ә хәҙер! Тәмле генә итеп мейестә балыҡ менән йәшелсәләр бешереп алайыҡ. Еп-еңел генә ул. Туңдырғыстан скумбрия балығын күптән сығарып ҡуйҙым, баюҡ ирене, мине көтә). Биш кишерҙе ҡырғыстан үткәреп, ике һуғанды ярым түңәрәкләп турағас, туңдырылған йәшел фасоль, брокколи ҡуштым. Аҙаҡ ике ҡалаҡ көнбағыш майы ҡойоп, тоҙлап-борослап бутаным. Ошо ҡатнашманы ике ҡат ҡурғаш ҡатлап һалынған табаға һалдым. Бына инде йәшелсәләр өҫтөнә йыуып-таҙартылған, тоҙлап-боросланған балыҡты һалырға ла сират етте. Скумбрия - бик майлы балыҡ, шуға майонез-ҡаймаҡ һөртөп торманым инде. Үәт шул ғына! Балыҡ менән йәшелсәләрҙең өҫтөн ҡурғаш менән ҡаплайбыҙ ҙа табаны мейескә оҙатабыҙ. Мин бер сәғәт һүрән утта бешерҙем.Шул тиклем, бына шул тиклем тәмле булды! Ысын әйтәм! Аштарығыҙ тәмле, тормошоғоҙ йәмле, бәхетегеҙ түңәрәк булһын, дуҫтарым! Бер нимәгә ҡарамай бәхетле булырға тырышығыҙ, йәме!"- тип яҙған Гөлназ Ишемғолова. Ысынлап та бәхетле булыу өсөн ҡайһы саҡта бер йылы һүҙ һәм мейестә бешкән балыҡ та етә. Фото һәм сығанаҡ: Гөлназ Ишемғолова.
