Нефтселәр ауыл халҡын онотмай

Шишмә районы үҙәгендә бер нисә ай инде яңы коммуналь техника – фронталь тейәгес, күп функциялы манипулятор һәм башҡалар – эшләгәнен ҡасаба халҡы күреп өлгөрҙө инде. Был ҡорамалдарҙы районға “Башнефть” акционерҙар йәмғиәте (“Роснефть” акционерҙар йәмғиәтенә инә) бүләк итте. “Башнефть” – илебеҙҙең нефть һәм газ сығарыу тармағында иң күптәнге предприятиеларының береһе. Был коллектив һәм уны үҙ составына алған “Роснефть” йәмғиәте ошо компания предприятиелары эшләгән төбәктәрҙә халыҡтың социаль именлеге өсөн комплекслы саралар күрә. Компанияла тормош сифатын яҡшырта барыу һәм ауыл-ҡасабаларҙағы инфраструктураны камиллаштырыу буйынса киң масштаблы программа раҫланған. – Яңы тейәгес менән манипуляторға тейешле тест үткәрҙек, техниканың бөтә өлөштәре лә талап иткәнсә эшләй, улар юғары маневрлы, йыйнаҡ, ҡеүәте ҙур, файҙаланыуҙа универсаль. Манипулятор йөк тейәү һәм бушатыуҙы, төҙөлөш эштәрен байтаҡҡа еңеләйтте, алты тоннанан ашыу күтәрергә һәләтле фронталь йөк тейәгес тә ташыуҙа һәм башҡа эштәрҙә тотҡарлыҡһыҙ эшләй, – ти Шишмә ҡасабаһы хакимиәте башлығы Булат Вәлиуллин. – Яңы техникала эшләргә егеттәр, әлбиттә, бик теләп риза булды, иҫкеләре көн һайын тиерлек мәшәҡәттәр тыуҙырып ҡына тора ине. Былары менән бер ҡыш сыҡтыҡ – һис ниндәй проблема юҡ. Тимәк, артабан беҙгә тәбиғәт көйһөҙлөгөнә ҡаршы көрәшеү еңеләйҙе. Башҡортостан Хөкүмәте менән “Роснефть” компанияһы араһында төҙөлгән килешеүгә ярашлы, социаль һәм спорт объекттарын төҙөү һәм реконструкциялау, һыу тәьминәте һәм йыуынты һыуҙы түгеү системалары булдырылды, парктар һәм скверҙар төҙөкләндерелде, юлдар түшәлде, коммуналь һәм махсус техника һатып алынды, был иһә республика халҡының тормош кимәленә ыңғай йоғонто яһаны. Һуңғы биш йылда Башҡортостан нефтселәре республикалағы 300-ҙән ашыу социаль әһәмиәтле объекттар төҙөлөшөн финансланы. Ришат МАНСУРОВ, Шишмә районы хакимиәте башлығы: – “Башнефть” асыҡ акционерҙар йәмғиәте һәм Социаль маҡсатлы программалар фонды ярҙамы менән Шишмә районының коммуналь техника паркы тулыландырылды. Был акционерҙар йәмғиәте менән беҙҙе күптәнге хеҙмәттәшлек ептәре бәйләй. Һуңғы биш йылда нефтселәр ярҙамы менән районыбыҙҙа Башҡортостан Республикаһының халыҡ шағиры Мостай Кәримдең тыуғана ауылы Келәштә Мәҙәниәт йорто төҙөлдө, Шишмә ҡасабаһында 2-се мәктәптең түбәһе ремонтланды. Горное ауылында һыуалғысҡа реконструкция яһалды, Языково – Бәлешле – Шишмә юлы ремонтланды. Ошондай уҡ шәфҡәтлелек акцияһына ярашлы, “Башнефть” ярҙамы менән бөгөн Шишмәлә комплекслы үҙәк бинаһы төҙөлөп бөтөп килә, унда фельдшер-акушер пункты, китапхана һәм ауыл биләмәһе хакимиәте урынлашасаҡ. Шишмә районына беҙҙең шундай изге ынтылыштарҙа йомарт ярҙам күрһәткәне өсөн “Башнефть” етәкселегенә ҙур рәхмәт. Һәм, әлбиттә, Башҡортостан Башлығы Радий Хәбировтың күрһәтмәләренә ярашлы хәйриә ярҙамын ойоштороусы Социаль маҡсатлы программалар фондына ла бик рәхмәтлебеҙ.