Йәштәрҙе йәлеп итеү тотороҡло үҫеш тәьмин итә

Башҡортостан Хөкүмәтенең матбуғат хеҙмәте хәбәр итеүенсә, Евразия ғилми-белем биреү үҙәге Вуз-ара кампусының Технологиялар трансферы үҙәге декарбонизация технологиялары йәрминкәһен үткәрҙе, унда коммерция компаниялары, яғыулыҡ-энергетика комплексы предприятиелары, урындағы үҙидара һәм власть органдары, венчур фондтары үҙҙәренең стартап-проекттарын тәҡдим итте. Йәрминкәне ойоштороусы булып Рәсәй экология йәмғиәтенең Башҡортостан буйынса төбәк бүлексәһе ярҙамында Өфө дәүләт нефть техник университеты сығыш яһаған. - Экологик проблемаларҙы хәл итеүгә йәштәрҙе йәлеп итеү тотороҡло үҫеште тәьмин итә. Йәштәр киләсәк төҙөй һәм уларҙың әүҙем ҡатнашыуы экология өлкәһендә оҙайлы ваҡытҡа ыңғай үҙгәрештәргә килтереүе мөмкин. Беҙ декарбонизация өлкәһендәге инновацион проекттарға һәр яҡлап ярҙам итәбеҙ, - тип һыҙыҡ өҫтөнә алды Рәсәй экология йәмғиәтенең Башҡортостан буйынса төбәк бүлексәһе етәксеһе Светлана Леонтьева. Декарбонизация - Рәсәйҙең стратегик милли проекты. Ил Хөкүмәте 2050 йылға тиклем илдең социаль-иҡтисади үҫеш стратегияһын һәм Рәсәй Федерацияһының Климатик доктринаһын раҫланы. Декарбонизация технологиялары Евразия ғилми-белем биреү үҙәгенең Вуз-ара кампусын стратегик үҫтереү программаһына инә һәм «Өҫтөнлөк 2030» программаһына ярашлы Өфө дәүләт нефть техник университетының 2030 йылға тиклемге стратегик үҫеш йүнәлештәренең береһе булып тора. - Беҙ ҡуйылған бурыстарға ярашлы идеялар эҙләп табыуҙа һәм проекттар әҙерләүҙә ярҙам иткән хакатондар үткәрәбеҙ. Улар иҫәбендә - техник киндерҙән туҡымалар нигеҙендә кейем моделдәрен әҙерләү, үҫемлек сеймалы нигеҙендә биотарҡалыусан пластик аналогын етештереү технологияһын эшләү, техник киндерҙән сеймалды химик эшкәртеү юлы менән нығытылған сүстәр алыу ысулдарын эҙләү, бинала СО2 концентрацияһын билдәләүҙең арзан ысулын эҙләү, үҫемлек сеймалын өҫтәп, эшкәртелгән полиэтилендан әҙер продукция әҙерләү технологияһын эшләү һәм башҡалар. Һөҙөмтәлә инновацион проекттар әҙерләнгән, уларҙың бер өлөшө «УМНИК» конкурсында ҡатнаша. Бер нисә проектҡа ӨДНТУ-ның Стартап-студияһы хеҙмәттәшлек тәҡдим итте, - тип билдәләне «Кампус» яуаплылығы сикләнгән йәмғиәте директоры, ӨДНТУ-ның Технологиялар трансферы идаралығы начальнигы Сергей Гладких. Декарбонизация технологиялары йәрминкәһендә ҡатнашҡан проекттар Технологиялар трансферы үҙәге булышлығында «УМНИК» инновацияларға булышлыҡ итеү фондының грант конкурсына ғариза биргән. Университет технологик эшҡыуарлығының федераль платформаһы рейтингына ярашлы, Өфө дәүләт нефть техник университеты Рәсәйҙә студенттар стартаптары һаны буйынса тәүге бишәү иҫәбенә ингән. Ә Башҡортостан 50 иң күп проект тәҡдим иткән төбәктәр араһында дүртенсе урын алған. ТОП-1000 рейтингының иң юғары баҫҡысында торған, Өфө дәүләт нефть техник университеты командаһы (проекттың лидеры - Шадрина Айгөл) әҙерләгән «Киләсәк образы» проекты илдең иң яҡшы стартапы ттп табылған. Мәғлүм булыуынса, Евразия ғилми-белем биреү үҙәгенең юғары уҡыу йорттары-ара кампусының технологиялар трансферы үҙәге стартап-проекттарҙы үҫтерергә һәм инвестициялар йәлеп итергә ярҙам итә. Төп йүнәлештәр - Инновацияларға булышлыҡ итеү фондының грант конкурстарына ғаризалар төҙөгәндә консультатив һәм эксперт ярҙамы, «Стартап диплом булараҡ» форматында сығарылыш квалификация эштәрен әҙерләү буйынса консультациялар, проектты йәки технологияны һатып алыу мәсьәләләре буйынса тармаҡ компаниялары менән үҙ-ара эш итеүҙе яйға һалыу. Хәтерегеҙгә төшөрәбеҙ, Рәсәй Президенты Владимир Путин 2030 йылға тиклем 25 заманса кампустан торған селтәр төҙөү маҡсатын ҡуйҙы, уларҙың 17-һе әлеге ваҡытта тормошҡа ашырылыу кимәлендә. Быға Рәсәй Мәғариф һәм фән министрлығы тормошҡа ашырған «Фән һәм университеттар» милли проекты ярҙамында өлгәшелгән. Фото: pravitelstvorb.ru