Яугилделә ҡаҙ өмәһе гөрләне!

Милли йолаларыбыҙ тарих сөңгөлдәрендәге үткәндәребеҙҙе сағылдырып ҡына ҡалмай, бөгөнгөбөҙҙө күрһәтеп, киләсәккә ышаныслы юл да яра. Улар араһында һәр тәбиғт миҙгеленә генә хас булғандары ла бар. Мәҫәлән, ҡаҙ өмәһе – тап әлеге ерҙең ап-аҡ ҡарға төрөнгән, көндәр ныҡлап һалҡыная башлағас, уҙғарыла торған йолаларыбыҙҙың береһе. Ул элек-электән матур аралашыу, күңел асыу, хатта үҙеңде күрһәтеү өсөн дә бик матур сара булған. Бигерәк тә йәштәр ҡаҙ өмәһен көтөп алған. Шулай итеп, ауылдаштар бергәләп ҡаҙ һуйыр булған. Өҫтәүенә, ҡаҙ – ул ауыл кешеһенең йәй буйы атҡарған хеҙмәт емеше лә. Йәй буйы ҡош-ҡорт аҫрап, уны хәҙер ауылдаштар менән күмәкләшеп һуйыу, итен эшкәртеү һәм башҡалар – былар барыһы ла үҙ-ара татыулыҡты, берҙәмлекте арттырған. Ошондай матур йолабыҙ Ғафури районының Яугилде ауылында ла үткәрелде. Ул Бурлы ауыл биләмәһенә ҡарай. Тап ошо ауыл “Айыҡ ауыл” конкурсының муниципаль этабында еңеүсе тип табылды. Ошо уҡ конкурс сиктәрендә “Ҡаҙ өмәһе” йолаһы ойошторолдо. Ә был сараға яугилделәр бик етди әҙерләнде, бай йөкмәткеле күргәҙмәләр ҡуйылды. Ә “Ҡаҙ өмәһе” Айгөл менән Рауил Солтанморатовтар йортонда үткәрелде. Ғаилә башлығы – Ғафури районы хакимиәтенең мәғариф бүлеге етәксеһе, ә уңған хужабикә – башлағыс кластар уҡытыусыһы. Сарала Ғафури районы хакимиәте башлығы Фәнзил Фәиз улы Сыңғыҙов, Башҡортостан Дәүләт йыйылышы – Ҡоролтай рәйесе урынбаҫары Рөстәм Рифат улы Ишмөхәмәтов, Ғафури район советы һәм район башҡорттары ҡоролтайы рәйесе Фаил Һиҙиәт улы Зәйнетдинов, Башҡортостан Милли архивы директоры урынбаҫары, сығышы менән Яугилде ауылынан булған Ниязбай Булатбай улы Сәлимов, Бурлы ауыл биләмәһе хакимиәте башлығы Рәүфә Ғәбдрәхим ҡыҙы Хәйретдинова, райондың башҡа ауыл биләмәһе хакимиәттәре башлыҡтары, вәкилдәре, хаҡлы ялдағы ветеран уҡытыусы Лилиә Әхмәтгәрәй ҡыҙы Миниязова, тағы күрше Архангел районы вәкилдәре ҡатнашты. Ғафури районы үҙенең батырҙары менән дан тота. Улар араһында СССР-ҙың өс Геройы, Рәсәй Федерацияһы Геройы, “Дан” орденының тулы кавалеры бар. Ғәҙәттәгесә быйыл да сарала ҡатнашыусылар Рәсәй Геройы Фәрүәт Абдулла улы Яҡуповтың тыуған яғында уны офицерҙың туғандары, яҡташтары менән бергә хәтергә алдылар. Батыр бюсына сәскәләр һалдылар. Алтынсы йыл инде батыр иҫтәлегенә милли көрәш буйынса турнир үткәрелә. Быйыл 17 йәшкә тиклемге егеттәр араһында һигеҙ ауырлыҡ үлсәмендә ярыштар ойошторолдо. Спорт сараһында 40-тан ашыу уҡыусы үҙ көсөн һынаны. Һөҙөмтәлә үҙ ауырлыҡ үлсәмдәрендә Вадим, Алмаз һәм Азат Нәзировтар – бер туғандар – беренсе урын яуланы. Әйткәндәй, Вадим 60 һәм 65 килограмлыҡ ауырлыҡ үлсәмдәрендә беренсе урынға сыҡты. Уларҙың һәр береһе Герой яҡташтары кеүек батыр, сәмсел һәм илһөйәр булып үҫер тип ышанабыҙ. Бынан тыш, һигеҙ ауыл ағинәйҙәре, ҡул эштәре оҫталары – мендәрҙәр, 16 ауыл биләмәләре хакимиәттәре хужабикәләре бешерелгән ризыҡтарҙан торған өҫтәлдәр биҙәлеше буйынса бәйгелә ҡатнашты. Ҡаҙ өмәһе матур йырҙар, йәнле аралашыу менән үрелеп барҙы. Яугилделәргә “Айыҡ ауыл” конкурсының республика этабында уңыштар һәм, әлбиттә, еңеү теләйбеҙ! Ҡасим Латипов фотолары.