Հայաստանի ԳԱԱ Արևելագիտության ինստիտուտի տնօրենի խորհրդական, թուրքագետ, ակադեմիկոս Ռուբեն Սաֆրաստյանը Armenia Today-ի հետ զրույցում մեկնաբանել է Արաբական աշխարհի ու Մերձավոր Արևելքի հետ Հայաստանի հարաբերությունների ակտիվացումը։
Նա մասնավորապես անդրադարձել է Սաուդյան Արաբիայի հետ Հայաստանի դիվանագիտական հարաբերությունների հաստատման և Իրաքի նախագահի՝ Հայաստան այցի թեմաներին։
Արևելագետի խոսքով՝ Հայաստանի համար շատ կարևոր են Արաբական աշխարհի հետ հարաբերությունները և դա պատմականորեն այդպես է։
«Մենք ունենք արաբական աշխարհի՝ նրա ժողովուրդների ու երկրների հետ հաղորդակցվելու երկար պատմություն և պահական չէ, որ Երևանում հայ և արաբ ժողովուրդների բարեկամության հուշարձան կա։ Այնպիսի կարևոր երկրի հետ, ինչպիսին Սաուդյան Արաբիան է, դիվանագիտական հարաբերություն հաստատելը, կարծում եմ, կարևոր քայլ էր այդ բարեկամությունն ավելի պրակտիկ հողի վրա տեղափոխելու համար»,- ասաց նա։
Ինչ վերաբերվում է Իրաքին, ապա, մասնագետի խոսքով, այն կարևոր է մեզ համար նաև նրանով, որ այնտեղ մենք ունենք հայկական համայնք, որը վերջին տարիներին բավական ակտիվ է։ Բացի դրանից, Իրաքում են բնակվում նաև քրդեր, որոնց ստեղծած միավորման հետ նույնպես բավական սետ կապեր կան Սաֆրաստյանի խոսքով։
«Արաբական աշխարհի հետ հարաբերությունները խորացնելու համար պետք է դիվանագիտական առումով ավելի ակտիվ լինել, կարողանալ գտնել շահերի ընդհանրություն։ Մենք տեսնում ենք, որ աշխարհում փոխվում է աշխարհակարգը։ Եվ Արաբական աշխարհը, Մերձավոր Արևելքը սկսում են առավել ակտիվ դերակատարում ստանձնել, և հասկանալով այս նոր միտումը, պետք է ակտիվ աշխատել և օգտագործել հայկական համայնքները, որոնք կան արաբական երկրներում, այդ կապերն ավելի ինտենսիվ դարձնելու համար»,- ընդգծեց փորձագետը։
Ըստ նրա՝ մենք լավ հարաբերությունների հիմք ունենք, որովհետև անկախության տարիներին բավական սերտ հարաբերություններ են հաստատվել արաբական երկրների հետ, մասնավորապես՝ Սիրիայի, Լիբանանի, բայց պետք է աշխատել նաև այլ ուղղություններով, ինչի առաջին քայլերը մենք տեսնում ենք։
«Իհարկե Ադրբեջանը փորձում է խանգարել այդ հարաբերությունների հաստատամանը, սակայն դիվանագիտության իմաստն էլ այն է, որ եթե քեզ փորձում են խանգարել, կարողանաս դիվանագիտական ճանապարհով խանգարողի ծրագրերը չեզոքացնել»,- նշեց Սաֆրասյանը։
Այդպիսի օրինակ է Սաուդյան Արաբիայի հետ դիվանագիտական հարաբերությունների հաստատումը, նշեց մեր զրուցակիցը, հավելելով, որ նա տասնամյակներով ՀՀ-ի հետ հարաբերություններ չէր հաստատում, իսկ հիմա հաստատել է։
«Նա մեծ հեղինակություն ունի արաբական աշխարհում և, կարծում եմ, որ դա էլ պետք է օգտագործել»,- եզրափակեց Սաֆրաստյանը։
Հիշեցնենք, որ նոյեմբերի 25-ին Հայաստանն ու Սաուդյան Արաբիան ստորագրել են դիվանագիտական հարաբերությունների հաստատման արձանագրություն։ Ավելի վաղ՝ նոյեմբերի 22-ին, Իրաքի նախագահ Աբդուլ Լատիֆ Ռաշիդի այցը Հայաստան էր այցելել դիվանագիտական հարաբերությունների հաստատումից ի վեր նա առաջին անգամ։