Бөгөн, 26 октябрҙә, Өфөлә Полилингваль белем биреү буйынса халыҡ-ара форум үҙ эшен башланы. Уның эшендә Рәсәйҙең 12 төбәгенән һәм Ҡаҙағстандан вәкилдәр ҡатнаша. Форумды тантаналы асыу сараһы баш ҡалабыҙҙың Колонналар залында үтте. Башҡортостан мәғариф һәм фән министры Илдар Мәүлетбирҙин билдәләүенсә, республикабыҙҙа полилингваль белем усаҡтары бурыстарына яуаплы ҡарай, ғөмүмән, был тәңгәлдә, белем биреү яҡшы ойошторолған. Илдар Марат улы педагогтарға эштәрендә уңыштар теләне, балаларға төплө белем һәм күркәм тәрбиә биргәндәре өсөн рәхмәт һүҙҙәрен еткерҙе. Аҙаҡтан министр юғары күрһәткәстәргә өлгәшкән уҡытыусыларҙы бүләкләне, сара йыр-моң һәм бейеү менән аралашып барҙы. Артабан форумда ҡатнашыусылар өсөн баш ҡалабыҙҙың юғары уҡыу йорттарына, мәктәп һәм гимназияларға сәфәр ойошторолдо. Айрат Нурмөхәмәтов фотолары.