Был сиргә дауа бармы?

Рәсәйҙә 2 октябрҙән 8 октябргә тиклем һөт биҙе яман шеше сире менән көрәш аҙналығы тамамлана, әммә проблема шул көйөнсә ҡала. Яман шештең был төрө - донъяла иң киң таралған онкология сирҙәренең береһе. Шуныһын да белеү мөһим, ир-ат та был сиргә дусар, уларға сама менән бөтә асыҡланған сир осраҡтарының бер проценты тура килә. Кемдәр хәүеф төркөмөнә ҡарай? Сирҙе нисек иҫкәртергә? Республика клиник онкология диспансерының маммология бүлексәһе мөдире, медицина фәндәре докторы, юғары категориялы онколог Марат Ғәлиев ҡатын-ҡыҙҙарҙы ҡыҙыҡһындырған һорауҙарға яуап бирҙе. –Башҡортостанда һөт биҙе яман шеше онкология сирҙәре араһында нисәнсе урынды биләй? –Бына ун йыл инде республикала онкология сирҙәренең дөйөм структураһында ул беренсе урынды тота. Сирле 110-120 ҡатын-ҡыҙға һөт биҙе яман шешенә дусар бер ир тура килә. Йылына һөт биҙе яман шеше диагнозы ҡуйылған 15-16 ир асыҡлана. –Бындай сирлеләр араһында үлем осраҡтары күпме? –Ярайһы ғына ауыр, агрессив шеш ул. Әммә ваҡытында асыҡлағанда, уны яҡшы дауалап була. Ни тиклем иртәрәк асыҡланһа, шунса һауығыуға ышаныс ҙурыраҡ. Әгәр шеш беренсе-икенсе стадияла асыҡланһа, пациенттарҙың 90-95 проценты иҫән ҡаласағына өмөт бар. Өсөнсө стадияла 45 проценты һауыға, ә дүртенсе стадияла диагноз ҡуйылғандан һуң биш йылға тиклем йәшәүселәр бик аҙ. –Һәр ваҡытта ла шеште ҡул менән ҡапшап ҡарап асыҡлау мөмкинме? –Йыш ҡына төйөрҙәр һөт биҙе туҡымаһында тәрән урынлаша, шуға күрә уларҙы ҡапшап ҡына тойоуы мөмкин түгел. Беҙ ҡатын-ҡыҙҙарға даими рәүештә маммографияға йөрөргә тәҡдим итәбеҙ, ул– һөҙөмтәле тикшереү төрө. Ҡырҡ йәштән һуң уны ике йыл һайын үтеп торорға кәрәк. Йәш ҡатындар йыл һайын ультратауыш тикшереүе үтергә тейеш, был ҡорамалда хатта миллиметр ҙурлығындағы үҙгәрештәр ҙә күренә. Маммография үтергә тәҡдим итмәйбеҙ, сөнки уларҙың ағзаһындағы туҡыма бик тығыҙ, процедураның тәьҫирһеҙ булыуы ихтимал. Фото: Һаулыҡ һаҡлау министрлығы.