Бөгөн тәүге тапҡыр ҙур тарихи әһәмиәткә эйә булған ваҡиғаға арналған иҫтәлекле дата – Берләшеү көнө билдәләнә. Теүәл бер йыл элек Рәсәй составына дүрт көньяҡ төбәк – Донецк һәм Луганск халыҡ республикалары, шулай уҡ Херсон һәм Запорожье өлкәләре кире ҡайта. Уларҙың халҡы референдумдарҙа үҙ ихтыярын белдерә. Башҡортостан менән Новороссияны яҡын, йылы һәм ысын мәғәнәһендә туғанлыҡ мөнәсәбәттәре бәйләй. Беҙҙең дуҫлыҡтың тарихи тамырҙары бар. Тап Донбасс ерендә Миңлеғәле Шайморатов етәкселегендә легендар 112-се Башҡорт кавалерия дивизияһы фашистар менән һуғыша. Ҡурҡыу белмәгән генерал 1943 йылда хәҙерге Луганск янындағы алыштарҙа һәләк була. Һәм Башҡортостан тәүгеләрҙән булып Луганск Халыҡ Республикаһына ярҙам ҡулы һуҙыуы осраҡлы түгел. Ә Красный Луч ҡалаһы менән күптәнге тарихи бәйләнештәрҙе иҫәпкә алып, килешеүгә ҡул ҡуйыла, уға ярашлы республика уның өҫтөнән шефлыҡ итә. Бөгөн беҙ эшләгән бурыстар даирәһе бик киң – коммуналь инфраструктураны, энергетика объекттарын тергеҙеү, күп фатирлы йорттарҙы, юлдарҙы һәм магистралдәрҙе капиталь ремонтлау, алдағы ҡышҡы миҙгелгә әҙерлек. Башҡортостан Республикаһының бер Торлаҡ-коммуналь хужалыҡ министрлығына ғына 36 төрлө объект беркетелгән. Социаль учреждениеларға айырыуса ҙур әһәмиәт бирелә – беҙҙең белгестәр Красный Лучта мәктәптәрҙе һәм балалар баҡсаларын тергеҙә. Башҡортостан төҙөүселәре көсө менән шулай уҡ ЛХР-ҙың Петровское ҡалаһында Миңлеғәле Шайморатов исемендәге 22-се мәктәп реконструкцияланды. Яңы төбәктәрҙә йәшәүселәр өсөн даими рәүештә гуманитар ярҙам ебәрелә, төҙөлөш материалдары, медицина препараттары, ҡорамалдар, аҙыҡ-түлек, бөтәһе 38 гумконвой ойошторола. ДХР, ЛХР, Запорожье һәм Херсон өлкәләренең Рәсәй Федерацияһы менән берләшеү көнө менән илебеҙҙең бөтә халҡын ҡотлайым. Бергәләп бөтә һынауҙарҙы ла еңеп сығырбыҙ, тип ышанам. Яңы субъекттар сәскә атһын, Рәсәйҙең башҡа төбәктәре менән дуҫлыҡ һәм теләктәшлек бәйләнештәрен нығынһын. Сығанаҡ: https://vk.com/wall555400080_9061