Өфө фән һәм технологиялар университетының Башҡорт филологияһы, шәрҡиәт һәм журналистика факультеты деканы Гөлфирә Абдуллина социаль селтәрҙәге сәхифәһендә бик матур яҙма менән уртаҡлашты. “Факультеттың "Йәшлек" коллективының ике (!!!) бейеүе абруйлы "Байыҡ" телевизион конкурсының Гала-концертына үтте. Факультет тарихында беренсе тапҡыр бейеү ансамбле төҙөүебеҙгә күп тә түгел әле, дәртле егеттәребеҙ һәм ҡыҙҙарыбыҙҙың тыпырлаҡтары университеттың дүртенсе ҡатында киске туғыҙҙа ла ишетелә. Йәш быуынды бейеү сәнғәтенә ылыҡтырыу үҙ һөҙөмтәһен бирмәй ҡалмаҫ, тибеҙ. Профессионалдар булып китмәгән хәлдә лә, үҙешмәкәр кимәлдә киләсәктә бер нисә баланы ғына ла башҡортса бейергә, төп хәрәкәттәрҙе эшләргә өйрәтһәләр – беҙ үҙ маҡсатыбыҙға ирештек тигән һүҙ. Беҙҙең ошо төп маҡсатты дөрөҫ аңлап, студенттарыбыҙҙың бейеүгә булған ынтылыштарын һүндермәйенсә, ипләп кенә кәңәштәрен еткергән баһалама комиссияһы ағзаларына, һәр конкурсантты дәртләндереп, хуплап торған Рита Өмөбаеваға, уның берҙәм командаһына ышаныстары өсөн ҙур рәхмәт! Һәүәҫкәр бейеүсе булараҡ, беҙҙең "ҡошсоҡтар"ҙың да сығышында ҡытыршылыҡтар булыуы тәбиғи, әлбиттә. Ун көн – бер ай эсендә бейеү өйрәнергә, шул арала уҡыуҙан да артта ҡалмаҫҡа кәрәк. Ансамблдең составы йыш үҙгәреп тора, кейемде лә прокатҡа ғына алабыҙ, әҙерлек өсөн көҙгөлө матур зал юҡ. Әммә былар ғына беҙҙең рухлы, маҡсатлы йәштәребеҙгә кәртә була алмай. Өс номер әҙерләнек "Байыҡ"ҡа. Сибәр, нәзәкәтле Зөһрәбеҙ тәүге турҙа "Хан ҡыҙы"н бейене, икенсе турҙа "Заһиҙә"не башҡарҙы. Эх, саҡ ҡына етмәй ҡалды финалға! Ярай, күңелеңде төшөрмә, һомғол һылыуҡайыбыҙ, киләһе йылға мотлаҡ үтәсәкһең һин! "Йәшлек"тең тулы составы икенсе турға "Йыуаса" бейеүе менән сыҡты. Һай, үҙебеҙҙекеләр! Йәшлек дәрте урғылып тора үҙҙәренән! Ғорурланабыҙ! Афарин, ҡыҙҙар! Афарин, егеттәр! Афарин, ансамблдең етәкселәре (әйткәндәй, улар ҙа үҙебеҙҙекеләр: Наҙгөл Исхаҡова магистратурала уҡый, Илнар Байбулов аспирантура тамамланы). Рәхмәт, бейеүселәребеҙҙе күтәрмәләргә килеүсе ирекмәндәр! "Йәшлек"тең егеттәр төркөмө айырым маҡтауға лайыҡ. Беләһегеҙҙер беҙҙең факультетты "сибәр ҡыҙҙар факультеты" тип йөрөткәндәрен. Ысынлап та шулай ул. Әммә беҙҙә егеттәрҙең ниндәйҙәре уҡый! Ғорур баҫып факультет коридорынан үткәндәрендә һоҡланып ҡалырлыҡ! Бейегәндә күҙҙәренән осҡондар сәселеп тора! "Ете ырыу" бейеүен сәхнәгә сығарҙылар бөгөн. Ғорурлыҡтан күҙгә йәштәр эркелә. Бына ҡайҙа ул рух, дәрт һәм ныҡышмалылыҡ! Алға, беҙҙең бөркөттәр!” – тип яҙҙы студенттары өсөн ҙур ғорурлыҡ хистәре менән филология фәндәре докторы Гөлфирә Риф ҡыҙы Абдуллина. Башҡорт филологияһы, шәрҡиәт һәм журналистика факультетының бейеүсе йәштәренә уңыштар теләйбеҙ! Сығанаҡ һәм фото: vk.com/id524013760