“ЛУКОЙЛ-Уралнефтепродукт” компанияһы 30 йыллығын билдәләне

Бөгөн, 8 сентябрҙә, Өфөлә Башҡортостан Башлығы Радий Хәбиров «ЛУКОЙЛ-Уралнефтепродукт» компанияһының 30 йыллығына арналған тантаналы сарала ҡатнашты. Төбәк етәксеһе нефть тармағы етәкселеген, хеҙмәт коллективын һәм ветерандарын юбилей менән ҡотланы, шулай уҡ компанияның иң яҡшы хеҙмәткәрҙәренә Рәсәйҙең һәм Башҡортостандың дәүләт наградаларын тапшырҙы. - Барығыҙҙы ла «ЛУКОЙЛ-Уралнефтепродукт»тың 30 йыллығы менән ихлас ҡотлайым. Ошо ваҡыт эсендә компания Уралда һәм Волга буйында нефть продукттары баҙарында иң эре партнерҙарҙың береһенә әүерелде, - тип һыҙыҡ өҫтөнә алды Радий Хәбиров. - Һеҙ – һөҙөмтәле үҙ-ара мөнәсәбәттәр булдырған ышаныслы партнёрыбыҙ. Республика Башлығы компанияның әүҙем инвестиция сәйәсәтен һәм юғары социаль яуаплылығын билдәләне. - Еңел булмаған ваҡытта һеҙ стратегик үҫешкә йүнәлтелгән ҙур программаларҙы тормошҡа ашыраһығыҙ, - тине Радий Хәбиров. - Ветерандарға һәм компанияның алты мең кешенән торған коллективына иң изге теләктәр юллайым. Артабан да һөнәри үҫеш, тыныслыҡ һәм именлек теләйем! Шулай уҡ хеҙмәткәрҙәрҙе «ЛУКОЙЛ» асыҡ акционерҙар йәмғиәтенең нефть продукттарын һатыу буйынса вице-президенты Максим Дондэ иҫтәлекле дата менән ҡотланы. - Ҡәҙерле дуҫтар, һеҙ көн һайын халыҡ тарафынан баһаланған бик яҡшы эш башҡараһығыҙ. Ошо юлда һеҙгә ысын күңелдән уңыштар теләйем, - тип билдәләне ул. - Предприятиеға ярҙам иткәнегеҙ һәм Башҡортостанда уңайлы эш шарттары булдырғанығыҙ өсөн, Радий Фәрит улы, һеҙгә һәм республиканың идара итеү командаһына рәхмәт әйткем килә. Тантаналы сарала шулай уҡ «ЛУКОЙЛ» компанияһының халыҡ-ара профсоюз ойошмалары ассоциацияһы советы рәйесе Георгий Кирадиев һәм «ЛУКОЙЛ-Уралнефтепродукт» яуаплылығы сикләнгән йәмғиәтенең генераль директоры Айҙар Әбүзәров сығыш яһаны. Байрам программаһын Башҡортостандың сәнғәт оҫталарының һәм ижади коллективтарҙың концерты тамамланы. Сығанаҡ һәм фото: glavarb.ru