Өфөлә тағы бер матур сквер булдырыла

Өфөлә легендар өфөлө, Арктика тикшеренеүсеһе Валериан Альбанов исемендәге ҡотопсолар музейы янында сквер булдырыла. Уның барлыҡҡа килеүе “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль программаһы һәм өфөләрҙең проект өсөн тауыш биреүҙә әүҙем ҡатнашыуы һөҙөмтәһендә мөмкин булды. Төҙөкләндерелгән биләмәнең дөйөм майҙаны 900 квадрат метр тәшкил итә. Сквер ял итеү өсөн эскәмйәләр менән уңайлы ял итеү зонаһынан тора. Бында таш плитканан тротуар, яңы асфальт йәйелгән, бәләкәй архитектура формалары ҡуйылған. Инженер коммуникациялары һәм энергияны һаҡсыл файҙаланыусы заманса яҡтыртыу монтажланған. Скверҙы сентябрь аҙағына сафҡа индереү планлаштырыла. Иҫегеҙгә төшөрәбеҙ, Валериан Альбанов исемендәге полярсылар музейы Өфөлә 2021 йылда асылды. Ул Свердлов урамы, 88 адресы буйынса ике ҡатлы сауҙагәрҙәр усадьбаһы менән булдырылған архитектура ҡомартҡыһында урынлашҡан. Шул уҡ йылда Зәки Вәлиди урамындағы Башҡорт дәүләт медицина университеты бинаһына иҫтәлекле таҡтаташ ҡуйылды, унда ҡасандыр Өфө ир балалар гимназияһы урынлашҡан булған, 1891-1895 йылдарҙа унда Арктиканың буласаҡ билдәле тикшеренеүсеһе уҡыған. 2021 йылдың ноябрендә Өфөлә Валериан Альбановтың хәтерен бронзала мәңгеләштерҙеләр. Барельеф Аксаков урамындағы 7-се йорт ҡаршыһындағы аркала ҡуйылды. Бында, яҡында ғына, бала саҡта легендар полярник йәшәгән. Авторы – скульптор һәм Рәсәйҙең халыҡ рәссамы Салауат Щербаков. Өфө мэры Ратмир Мәүлиев билдәләүенсә, яңы сквер өфөләр өсөн яҡташыбыҙҙың тикшеренеү ҡаһарманлыҡтары тураһында хәтер урыны буласаҡ. Билдәле булыуынса, “Торлаҡ һәм ҡала мөхите” (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Өфө ҡалаһы хакимиәте.