Алһыу апай матурлыҡ тыуҙыра

Баймаҡ ҡалаһында йәшәгән замандашыбыҙҙы бөгөн тирә-йүндә ҡорама ҡорау оҫтаһы, маһир тегенсе тип беләләр. Алһыу Кәбир ҡыҙы ошо райондың Ғәҙелбай ауылында тыуып үҫә. Күрше Беренсе Этҡол урта мәктәбен тамамлағас, Баймаҡ ҡалаһында тегенсе шөғөлөн үҙләштерә, әммә был һөнәре буйынса оҙаҡ эшләргә насип булмай уға. Ҡул эштәренә маһирлыҡ – Алһыу апайға әсәһенән бирелгән һәләт. “Әсәйем бәйләү, тегеү, сигеү оҫтаһы булды. Беҙ бала саҡта балитәкле күлдәктәр тегеп, ырғаҡ менән башлыҡтар бәйләп кейҙерә торғайны. Ул ваҡытта пряжа тигән нәмә юҡ, һарыҡ йөнөн иләп, йыуып, шунан матур итеп ҡолаҡсынлы башлыҡтар бәйләй ҙә, төҫлө буяуға манып, киптерергә элеп ҡуя торғайны. Ырғаҡты ағастан яһап алды, – тип ҡәҙерле кешеһенә бәйле матур хәтирәләре менән уртаҡлашты ул. – Әсәйем нағышлап сигергә лә яратты. Уның сигеүле мендәр тыштары, түшәк-ҡаралты япмалары, таҫтамалдары өй эсебеҙгә йәм, биҙәк өҫтәй ине. Шуныһы үкенес: ҡәҙерле кешем йәшләй мәрхүмә булды, ә беҙ балалыҡ менән уның ҡулдары тыуҙырған ошо матурлыҡ өлгө­ләрен һаҡлай белмәгәнбеҙ. Ни тиклем матур, ҡәҙерле ҡомартҡы булыр ине улар...” Ә инде Алһыу Кәбир ҡыҙының үҙенә килгәндә, тегеү эшенә хаҡлы ялға сыҡҡас ҡына ныҡлап тотона. Уның оҫта ҡулдары тыуҙырған буй юрғандар, ултырғыс япмалары күҙҙең яуын алырлыҡ сағыу һәм матур. “Биҙәктәрҙе интернеттан да өйрәнәм, үҙем дә уйлап сығарам. Ҡорама ҡорауға тотонһам, йоҡлап киткәнсе күҙ алдымдан төрлө биҙәктәр китмәй. Был шөғөлөм шул тиклем оҡшай, күңелемә ял, рәхәтлек бирә”, – ти ул. Баймаҡ оҫтабикәһе сифатлы туҡымаларға ғына өҫтөнлөк бирә, бының өсөн күршеләге Сибай ҡалаһындағы махсус магазиндарға барып, күңеленә ятҡан тауарҙарҙы һайлап алып ҡайта. Ул юрған-япмаларҙан тыш, атлас таҫмалар менән биҙәп, декоратив мендәрҙәр ҙә эшләй. Таҫмаларҙы сиратлаштырып, заманса итеп әйткәндә, бик үҙенсәлекле 3D биҙәк барлыҡҡа килтерә. Буш ваҡыттарында яҡын­дарына бүләккә кейем-һалым да тегә. Мәҫәлән, ейәне Ильясҡа сынъяһау итеп башҡорт милли кейеме тегеп кейҙергән егәрле өләсәй. Быйыл Алһыу Солтангәрәева Баймаҡ районының “Ағинәйҙәр” йәмғиәте ойошторған ҡорамасылар бәйгеһендә ҡатнашып, беренсе урын яулаған. “Конкурста ҡатна­шырға киленем, һеңлем һәм әхирәтем дәртләндерҙе. Уларға ҙур рәхмәт, сөнки еңеүемә ныҡ шатландым, ул миңә дәрт-дарман өҫтәп, күңелемде үҫтереп ебәр­гәндәй булды”, – ти оҫта апай. Алһыу һәм Ғәлиәхмәт Сол­тангәрәевтәр Баймаҡ ҡалаһында үҙ йортонда йәшәй. Уларҙың татыу ғаиләһендә ике ул үҫкән. Бөгөн өлкән Солтангәрәевтар балаларын башлы-күҙле итеп, өләсәй-ҡартатай булыу ҡыуанысы кисереп йәшәй. Йәй етеү менән Солтангә­рәевтәрҙең ихатаһы гөл-сәскәгә күмелә: Алһыу апай бында ла үҙ ҡулдары менән матурлыҡ тыу­ҙырып кинәнә. Тегеү, сәскә үҫтереү менән бер рәттән, аш-һыу оҫтаһы ла, яҡындарын тәмле-татлы ризыҡтары менән һыйларға ярата Алһыу Кәбир ҡыҙы. Төрлө төҫтәге туҡыма киҫәк­тә­рен ялғап, үҙенсәлекле матур­лыҡ, сәнғәт өлгөһө тыуҙырған Алһыу Кәбир ҡыҙына халҡыбыҙҙың матур шөғөлөн артабан да үҫтереп, ҡу­лынан һөйөнөп, һәр ваҡыт шулай тормошто йәмләп йәшәүен те­ләйбеҙ. Фотолар Алһыу Солтангәрәеваның шәхси архивынан.