Әбйәлил районының Ишкилде ауылы ике йыл рәттән "Айыҡ ауыл" республика конкурсында ҡатнашты. Призлы урын яуламаһалар ҙа, дәртле һәм берҙәм ауыл халҡы бөгөн дә тыуған ауылын төҙөкләндереү буйынса әүҙем эш алып бара. Ошо көндәрҙә Сума йылғаһы буйында "Ҡолама" спорт майҙансығы асылды. Уның тап Физкультурниктар көнө алдынан асылыуы л юҡҡа түгел. Бында төрлө спорт ярыштары үтте, спорт ветерандары, тренерҙар тәбрикләнде, район, төбәк, респблика һәм донъя буйынса төрлө спорт ярыштарында еңеү яулаған чемпиондарға ГТО-ның алтын билдәләре тапшырылды. Артабан да "Ҡолама" спорт майҙансығында ишкилделәр төрлө саралар үткәрер, спорт менән шөғөлләнер һәм яңы көс, дәрт менән йәнә "Айыҡ ауыл" конкурсында ҡатнашырға теләк белдерер, тигән ышаныста ҡалабыҙ. Фото: Ласын Усманов.