11 тапҡыр еңеү яулағайнылар

“Салауат Юлаев”, “Динамо”, “Металлург” һәм “Автомобилист” Башҡортостан Республикаһының FONBET кубогы өсөн үҙ көсөн һынаясаҡ. 10 – 13 августа Өфөлә “Башҡорт­остан Республикаһының FONBET кубогы өсөн” турниры ойошторола. Унда “Салауат Юлаев”, “Динамо” (Мәскәү), “Металлург” һәм “Автомобилист” ҡатна­ша. “Динамо” ике тапҡыр Гагарин кубогын яуланы. Был юлы турнир матчтарында Олимпия уйындары чемпиондары Илья Каблуков менән Никита Гусев ҡатнаша. Улар быйыл йәй был командала уйнай башланы. “Динамо” иһә икенсе тапҡыр Өфөләге турнирҙа үҙ көсөн һынай. Былтыр ул икенсе урын яулағайны, ә беренсе урында юлаевсылар ине. “Металлург” Гагарин кубогын икенсе тапҡыр яуланы. Өҫтәүенә, ул Башҡорт­остан Республикаһы Кубогына матчтар­ҙа даими ҡатнаша. Магнитогорск командаһы турнирҙа туғыҙынсы тапҡыр уйнаһа ла, бер тапҡыр ҙа беренсе урынға сыға алманы. Команда капитаны – лиганың иң яҡшы һаҡсыларының береһе Егор Яковлев. Ул, белеүебеҙсә, Олимпия уйындары чемпионы. “Автомобилист” икенсе тапҡыр ошо турнирҙа ҡатнаша. Йәй был команданан Өфө командаһы тәрбиәләнеүсеһе Алексей Василевский “Салауат Юлаев” командаһына кире ҡайтты. Ә форвард Стефан Да Коста регуляр чемпио­наттың дүртенсе һөжүм итеүсеһе булды. Башҡортостан Республикаһы Кубогына ярыштар 1999 йылдан алып үткәрелә. Төрлө ваҡытта “Лада”, “Трактор”, “Югра”, СКА, Ҡаҙағстандан “Ба­рыҫ”, Чехияның “Энергия” һәм Словакиянан ХК-36 командалары үҙ көсөн һынап ҡараны. “Салауат Юлаев” 11 тап­ҡыр еңеү яуланы. Барлыҡ матчтар ҙа “Өфө-Арена”ла үткәрелә. Ярыштар теҙмәһе (Өфө ваҡыты): 10 август: 15:00 – “Автомобилист” – “Металлург”; 19:00 – “Салауат Юлаев” – “Динамо”. 11 август: 15:00 – “Динамо” – “Автомобилист”; 19:00 – “Салауат Юлаев” – “Металлург”. 13 август: 12:00 – “Металлург” – “Динамо”; 17:00 – “Салауат Юлаев” – “Автомобилист”. Айһылыу НИЗАМОВА