Бөгөнгө ҡот осҡос хәбәр барыһын да шаңҡытты: 23 йәшендә генә Сибай концерт-театр берекмәһенең "Сибай" халыҡ бейеү ансамбле солисы, талантлы һәм дәртле бейеүсе Илнар Хәтмуллин махсус хәрби операция барышында һәләк булды. Кисә социаль селтәрҙә уның ҡаты яраланыуы һәм юғалыуы хаҡында хәбәр таралды, ҡыҙғанысҡа ҡаршы, Илнар Хәтмуллин табылған, ләкин уны ҡотҡара алмағандар. Был хаҡта социаль селтәрҙә хәбәр итәләр.Февраль айында, Ватанды һаҡлаусылар көнө алдынан, артистың улы тыуғайны. Был хаҡта беҙ гәзитебеҙҙең сайтында ла хәбәр иттек. Йөҙөнән һәр саҡ йылмайыу китмәгән, ойоҫҡота баҫып, иҙәндәрҙе дер һелкетеп бейегән йәш һәм дәртле бейеүсенең башҡаса Сибай сәхнәләрендә күреп булмаясағына күңел ышанмай. Сөнки ул - ансамблдең ҡояшы, үҙе бер талисманы һәм йөҙө ине. Һомғол ҡарағастай төҙ һәм оҙон кәүҙәле, бөркөт ҡарашлы бейеүсене башҡалар менән бутау мөмкин дә түгел ине. Уның үҙенән нур балҡып, шул нур менән бар тамашасыларҙы ҡойондороп, әсир итеп бейер ине. Күңелдә - бары тик шул килеш кенә ҡалған. Илдә өлөшләтә мобилизация иғлан ителгәс тә, Сибай артистарының миҙгелде асыу концерты булды. Тәнәфестә иртәгеһенә бер төркөм артистарҙың махсус хәрби операцияға юлланыуҙары хаҡында ишетеп, уларҙың сығыштарын тамашасылар көслө алҡыштар менән оҙатҡан ине. Илнар Хәтмуллиндың шунда һуңғы сығышы булған. Бейей-бейей махсус хәрби операцияға юлланған инең дә бит, бейеп ҡайтырға тейеш инең дә... Тормош аяуһыҙ шул... Һөйөп тә туя алмаған кәләшең, "атай" һүҙен дә әйтеп өлгөрмәгән улың ҡалды... Ата-әсәйеңдең юлын дауам итеп, бейеү сәнғәтен үҙ итеп, тамашасыларыңды һоҡландырып бейегән бейеүҙәрең... Ата-әсәһенең, кәләшенең, яҡындарының һәм туғандарының ауыр ҡайғыһын уртаҡлашабыҙ. Йәнең йәннәттә булһын! Фото һәм видео: "Бәйләнештә"