Лейтенант ялға ҡайтты!

Генерал М. Шайморатов исемендәге батальондың “Док” позывнойлы медицина взводы командиры махсус хәрби операция зонаһынан тыуған ауылы Дүрмәнгә ялға ҡайтты. Доброволец тап ошо медицина взводында хеҙмәт итеүе менән ғорурлана. Егеттең ата-әсәһе әйтеүенсә, улдарының өйгә ҡайтыуы улар өсөн ҙур байрам булған. Шатлыҡ хистәренән күҙ йәштәре түгелеүе лә сер түгел, бер туғандары, хәләл ефете, улы һәм ҡыҙы өсөн бик бәхетле көн был. Лейтенант менән осрашырға бөтә туған-ырыуы йыйылған. Ул иптәштәренең батырлығы, берҙәмлеге хаҡында ла ғорурланып һөйләй. Бер ваҡыт дошмандың Рәсәй хәрбиҙәренең позицияларын минометтан утҡа тотоуы һөҙөмтәһендә күптәр ҡаты яралана. Санитарҙар - өлкән сержант Илдар, рядовой Наил һәм взвод командиры Дамир составындағы медицина взводы ҡаты ут аҫтында яралыларға тәүге ярҙам күрһәтеп, уларҙы алғы һыҙыҡтан хәүефһеҙ зонаға сығарған. Бик тиҙ, ойошҡан рәүештә эште башҡара алғандар. Егеттәрҙең бөтәһе лә – Башҡортостандан. Дамир генерал М. Шайморатов исемендәге батальон тураһында ҙур хәстәрлек күргәндәре өсөн республика етәкселегенә һәм халҡына ҙур рәхмәт белдерә. – 3 июлдә Башҡортостан Башлығы улыбыҙға М. Шайморатов исемендәге миҙал тапшырҙы. Оҙаҡламай үҙенең часына юлланасаҡ. Беҙ уға хәрби бурысын намыҫ менән үтәүен һәм иҫән-һау әйләнеп ҡайтыуын теләйбеҙ, – ти егеттең ата-әсәһе. Дамир үҙенең медицина юлын һайлауына һис үкенмәй, һуғыш яланынан алып сыҡҡан һалдаттарҙың иҫән ҡалыуына, һауығыуына ысын күңелдән шатлана. Салмалы урта мәктәбен тамамлағандан һуң ул Туймазы медицина колледжына уҡырға инә. 1999 йылда Эске эштәр министрлығының Шаран бүлексәһендә эшләй башлай. Алыҫ Көнсығышта һауа-десант ғәскәрҙәрендә хеҙмәт итә. Аҙаҡ медицина эшмәкәрлеген Серафимовка балалар йортонда дауам итә. Бер йылдан һуң Башҡортостан дәүләт медицина университетына уҡырға инә һәм шунда буласаҡ хәләл ефетен осрата. 2007 йылда вузды тамамлағандан һуң, Туймазы ҡалаһындағы ашығыс медицина ярҙамы бүлексәһенә эшкә урынлаша. Махсус хәрби операция башланғас, тәжрибәле медицина хеҙмәткәре доброволец булып китергә ҡарар итә. Уны медицина взводы командиры итеп тәғәйенләйҙәр, ә быйыл ғинуарҙа батыр егеткә лейтенант званиеһы бирелә. “Улыбыҙ өсөн олатаһының ҡаһарманлығы өлгө булды. Минең атайым Закир Шәйәхмәт улы һуғыштың тәүге көндәренән үк фронтҡа эләкте. Минометсы ине. Кенисбергҡа тиклем барып етте, орден-миҙалдар менән Еңеү яулап ҡайтты. Улыбыҙҙың олатаһының данлы традицияларын дауам итеүе менән ғорурланабыҙ”,– ти батырҙың атаһы. Руслан ХАФИЗОВ. Шаран районы.