"Ваҡыт беҙ көслө булыуыбыҙҙы һәм ошо һөжүмдәргә ҡаршы тора алыуыбыҙҙы күрһәтте"

Башҡортостан Республикаһы Дәүләт Йыйылышы – Ҡоролтайҙа "Союздаш дәүләтенең йәмәғәт дипломатияһы: Рәсәй һәм Беларусь йәмәғәт ойошмаларының һәм берекмәләренең интеграцияны алға этәреүгә индергән өлөшө” темаһына Рәсәй һәм Беларусь төбәктәренең Х Форумының секция ултырышы үтте. Модераторҙар булып Рәсәй Федерацияһы Федераль Йыйылышының Федерация Советының Халыҡ-ара эштәр буйынса комитеты рәйесе Григорий Карасин һәм Беларусь Республикаһы Милли Йыйылышының Республика Советының Халыҡ-ара эштәр һәм милли хәүефһеҙлек буйынса Даими комиссияһы рәйесе Сергей Рачков сығыш яһаны. Теманы тикшереүҙә Рәсәй Федерацияһы сенаторҙары, Беларусь Республикаһы Милли Йыйылышының Республика Советы ағзалары, Рәсәй һәм Беларусь дәүләт власы органдары, эксперт берләшмәһе, йәмәғәт ойошмалары вәкилдәре ҡатнашты. Башҡортостандың депутаттар корпусынан Дәүләт Йыйылышы – Ҡоролтай Рәйесе урынбаҫары Рөстәм Ишмөхәмәтов, республика парламентының даими комитеттары рәйестәре һәм ағзалары сығыш яһаны. Ултырышта Рәсәйҙә һәм Беларуста йәмәғәт берекмәләре эшмәкәрлеген ҡануни көйләү мәсьәләләре ҡаралды, шулай уҡ йәмәғәт ойошмаларының союз интеграцияһы идеяларын алға этәреү буйынса уңышлы эш практикаһы тикшерелде. Сығыштарҙа йәмәғәт берекмәләре эшмәкәрлеге ике дәүләт халыҡтарының мәҙәни төрлөлөгөн иҫәпкә алып, берҙәм мәҙәни-гуманитар киңлекте формалаштырыуға булышлыҡ итеүе һыҙыҡ өҫтөнә алынды. Шул уҡ ваҡытта был йүнәлештә уҙаҡташлыҡты нығытыу союздаш дәүләт төҙөлөшөнә йәмәғәтселектең ярҙамын көсәйтеүҙе тәьмин итә. Бөгөн союздаш дәүләт сиктәрендә интеграция хеҙмәттәшлеген “Белая Русь”, “Беларусь ҡатын-ҡыҙҙар союзы”, “Беларусь республика йәштәр союзы”, “Беларусь тыныслыҡ фонды” йәмғиәттәре, Беларусь Республикаһы Милли Йыйылышы ҡарамағындағы Йәштәр советы (парламент) әүҙем үҫтерә. Халыҡ-ара бәйләнештәрҙе һаҡлау һәм үҫтереү маҡсатында Рәсәй хеҙмәттәшлеге даими нигеҙҙә Бөтә Рәсәй Урындағы үҙидараны үҫтереү ассоциацияһы, Рәсәй Федерацияһы Президенты һәм Рәсәй Федерацияһы Хөкүмәте ҡарамағындағы Рәсәй төбәктәре вәкиллектәре етәкселәре советы, Рәсәй ҡалалары союзы менән үҙ-ара эш алып бара. Рәсәй менән төбәк-ара бәйләнештәр һәм туғандаш ҡалалар линияһы буйынса бәйләнештәрҙе киңәйтеүҙә Беларусь сит илдәр менән дуҫлыҡ һәм мәҙәни бәйләнеш йәмғиәте һәм “Туған ҡалалар” ойошмаһы ҙур ҡыҙыҡһыныу белдерә. Халыҡ дипломатияһы хәрәкәтендә ҡатнашыусылар составын киңәйтеү буйынса килешелгән пландар бар. Секция сиктәрендә Башҡортостан Республикаһы Ҡатын-ҡыҙҙар союзының һәм “Белорус ҡатын-ҡыҙҙар союзы” йәмәғәт берекмәһенең хеҙмәттәшлек тураһында Килешеүенә ҡул ҡуйылды. Ултырыш йомғаҡтары буйынса ҡатнашыусылар тәҡдимдәр проектын әҙерләне, унда төп бурыстар сағылдырылды, уларҙы хәл итеү берләштереү процестарын көсәйтеү маҡсатында Рәсәй Федерацияһының һәм Беларусь Республикаһының йәмәғәт ойошмалары һәм берекмәләренең тығыҙыраҡ үҙ-ара эш итеүенә булышлыҡ итәсәк. Журналистарҙың һорауҙарына яуап биреп, Рәсәй Федерацияһы Федераль Йыйылышының Федерация Советының Халыҡ-ара эштәр буйынса комитеты рәйесе Григорий Карасин секция сиктәрендә ҡаралған теманың юғары әһәмиәтен билдәләне. – Беҙ ҡатмарлы ваҡытта йәшәйбеҙ, Көнбайыш беҙгә санкция баҫымы аша йоғонто яһарға тырыша. Әммә ваҡыт беҙ көслө булыуыбыҙҙы һәм ошо һөжүмдәргә ҡаршы тора алыуыбыҙҙы күрһәтте. Парламент-ара бәйләнештәр кимәлендә ҡабул ителгән ҡарарҙар беҙгә ышаныслы алға барырға ярҙам итә, – тине Григорий Карасин. Был йәһәттән халыҡ дипломатияһы ҙур ҡеүәткә эйә, тип ышана Беларусь Республикаһы Милли Йыйылышының Республика Советының Халыҡ-ара эштәр һәм милли именлек буйынса даими комиссияһы рәйесе Сергей Рачков. – Бөгөнгө көндә айырым партиялар, йәштәр ойошмалары араһында тура бәйләнеш бар, әммә дөйөм алғанда халыҡ дипломатияһы мөмкинлектәре әлегә тулыһынса тормошҡа ашырылмаған. Союздаш дәүләтен интеграциялауҙы тышҡы контурҙа ла алға ебәрергә кәрәк. Рәсәй һәм Беларусь союзы бөтәһенә лә оҡшамай, беҙгә яҡшыраҡ аңлатырға, шул иҫәптән халыҡ-ара йәмәғәтселеккә Союзыбыҙҙың маҡсаттары һәм бурыстары тураһында мәғлүмәт бирергә кәрәк. Ул кемгәлер ҡаршы түгел, ә ике илебеҙ мәнфәғәтендә, иҡтисадты үҫтереүгә һәм халыҡтың именлеген арттырыуға йүнәлтелгән, – тине Сергей Рачков. Фото: gsrb.ru