Башҡорт һәм татар эстрадаһы артистары "Беҙ Бергә!" акцияһына ҡушылды

20 июндә Өфөнөң ҡала мәҙәниәт һарайында "Беҙ Бергә!" – "Беҙ бергә, Беҙ берҙәм!" хәйриә февстиваленең беренсе көнө үтте. Уны Өфө ҡала хакимиәте “ВиП-арт” продюсерлыҡ үҙәге менән берлектә ойоштора. Билеттар һатыуҙан килгән бөтә аҡса мобилизацияланған граждандарға ярҙам итеүгә, гуманитар ярҙам күрһәтеүгә йүнәлтеләсәк. Фестиваль Өфө ҡала хакимиәте башлығы Ратмир Мәүлиев башланғысы менән ойошторолған. Был тәҡдимде Башҡортостандың атҡаҙанған артистары Заһир Зәйнетдинов (ZAINETDIN), Зилиә Бәхтиева, Иҙел Нурғәлин, РСФСР-ҙың, Башҡортостандың һәм Татарстандың халыҡ артисы Фидан Ғафаров, Татарстандың халыҡ артисы, Башҡортостандың атҡаҙанған артисы Гүзәл Уразова, Башҡортостандың һәм Татарстандың атҡаҙанған артисы Илдар Хәкимов, популяр йырсылар Зинира һәм Ризат Рамазановтар күтәреп алды һәм матур сығыштарын тамашасыға бүләк иттеләр. Ике сәғәтлек концерт программаһын Өфөнөң "Мираҫ" йыр һәм бейеү ансамбле башҡарыуындағы "Өфө" вокаль-хореография композицияһы асты. Концертҡа махсус хәрби операцияла ҡатнашыусыларҙың ғаиләләре килгән, артистар уларға бағышлап йырҙар башҡарҙы. – Беҙ хис-тойғолар урғылып торған иҫ киткес тамашаны ҡараныҡ, уның тәүге өлөшө 20 июндә үтте. Ҡала хакимиәт башлығының саҡырыуына иң яҡшы артистар яуап бирҙе. Шуны билдәләп үтәм, улар барыһы ла бушлай сығыш яһаны һәм йыйылған аҡса яугирҙәребеҙгә ярҙамға йүнәлтеләсәк. Барығыҙға ла ҙур рәхмәт, алдығыҙҙа баш эйәм. Ижадығыҙ өсөн рәхмәт, – тине Өфө ҡала хакимиәте башлығы урынбаҫары Денис Ғәниев. Иҫегеҙгә төшөрәбеҙ, хәйриә концертының икенсе өлөшө бөгөн үтә. Фото: Өфө ҡала хакимиәте сайтынан.