Фәрит Хөрмәтулла улы “Атайсал” проектының ватанпәрвәрлек һәм Ватанга тирән мәхәббәт хисе белән сугарылуын билгели. – Чакмагыш районының Көсәкәй авылында әнием, дусларым, сыйныфташларым, туганнарым яши, ут күршеләр анда – аларны онытырга ярамый. Үз туган төбәкләрендә игелекле эшләр башкаручы башка кешеләр дә шулай фикер йөртә. Без кешеләр туган як геройлары турында белсеннәр өчен проект төзергә булдык һәм тормышны тирәнтен җанландырдык. Башкортстанда дүрт мең ярым авыл бар, – ди Фәрит Гыйндуллин. – Якташлыкны үстерәбез, урындагы муниципалитетларның эшкуарлар белән үзара бәйләнешен ныгытабыз, кешеләрдә кече ватаныбыз язмышы өчен җаваплылык уятабыз. Бу хәрәкәт бөтен республика буенча көч туплый – авыллар чәчәк ата.Фәрит Хөрмәтулла улы республиканың күп кенә меценатларына яхшы үрнәк күрсәтә. Ел саен авылдашлары белән бергә эре наратлар утырта, үз туган районында гына түгел, Уфада да ул тематик аллеялар утыртуда катнаша, экологик өмәләргә чыга. Бары тик уртак тырышлык белән генә республика табигатенең уникальлеген саклап калырга мөмкин, дигән фикердә ул. Ул ассызыклавынча, “Атайсал” проектында катнашу өчен зур капиталга ия булу, предприятие җитәкчесе яки бизнесмен булу мәҗбүри түгел. Күпчелек проектлар урыннарда, авыл халкы тәкъдиме белән туа, ә әлеге торак пунктларда канат ныгытып, аерым казанышларга ирешкән якташлар аларны гамәлгә ашырырга ярдәм итә. Ярдәм төрлечә була: бер көнгә трактор биреп торырга, балалар яки өлкән буын өчен бәйрәм үткәрергә, авылдашлар белән бергә урамнарны җыештыруда катнашырга мөмкин. Боларның барысы да һәр авылга, шәһәргә кирәк. – Минем өчен халыкның төзекләндерелгән авылда яшәве бик мөһим, ә юлларны ремонтлау мәсьәләсе һәрвакыт актуаль булды. Шуңа күрә, безнең проектны эшләтеп җибәрүне көтмичә, Аблай һәм Көсәкәй авыллары арасында, шулай ук чишмәгә һәм һәйкәлгә җиде чакрым юл салуны оештырдым, – ди эшкуар. Берничә ел рәттән җәен Көсәкәй авылында Башкортстанның күренекле артистлары Әнвәр Нургалиев, Фидан Гафаров, Айдар Галимов, Сәгыйдулла Байегетнең опен-эйр форматында хәйрия концертлары уза. Ике ел элек Фәрит Хөрмәтулла улы металл конструкцияләрдән сәхнә төзегән, аңа музыкаль җиһазларны тоташтыру өчен электр үткәргән. Концертларга яшьләр дә, өлкәннәр дә җыела, авыл турында онытмауларына, биредә тулыканлы тормышның кайнап торуына шатланып бетә алмыйлар алар. Мәкалә герое республикада киңкүләм спортны үстерүгә дә зур игътибар бирә. Аның сүзләренә караганда, шәхси үрнәктән яхшырак берни дә юк. Ярышларда, чараларда активлык күрсәтеп, балалар белән саф һавада мөмкин кадәр күбрәк вакыт үткәрергә тырышырга кирәк. Тиешле шартлар бар икән, һәр бала күңеленә хуш килерлек спорт төрен – чаңгыда узышумы ул, йөгерү, нәфис гимнастика яки шахматмы – сайлап, алар белән нәтиҗәле шөгыльләнә алачак. – Тренерлар һәм остазларга һәряклап ярдәм итеп, без яшьләрнең сәламәт, физик яктан таза буынын тәрбияли алабыз, – ди Фәрит Гыйндуллин. – Мисал өчен, скандинавия йөреше буенча фестивальләр оештырам, ел саен дрон-рейсинг буенча Башкортстан Башлыгы Кубогына чемпионат, хоккей һәм волейбол турнирларны үткәрүгә ярдәм итәм. “Атайсал” проектының идея илһамландыручысы һәм автордашы Фәрит Гыйндуллин, “Якташлык көче – Сила землячества” II республика форумында чыгыш ясап, аны Башкортстан бренды, дип атады. “Бүген инде “Атайсал – минем кече ватаным” проекты республикабыз халкы өчен яхшы, файдалы эшләр брендына әверелде, дип әйтергә мөмкин. Форумда катнашучылар билгеләп үтүенчә, проект безне игелекле эшләр кылырга берләштерә, рухландыра һәм илһамландыра. “Атайсал” ватанпәрвәрлек һәм Ватанга мәхәббәт хисе белән сугарылган. Шуңа күрә аның киләчәге зур, дип ышанам. Ике ел эчендә якташлык җәмгыятьләренең ничек берләшүен, меценатларның, хәйриячеләрнең һәм битараф булмаган кешеләрнең никадәр игелекле эшләр башкаруын күрү шулай дияргә ныклы нигез бирә. Әлбәттә, барысын да акча белән үлчәп булмый. Игелекле эшләр зур да, кечкенә дә булырга мөмкин. Иң мөһиме, кешеләр үзләренең кече ватаннары өчен чын күңелдән берәр изге гамәл кылсыннар. “Атайсал” исә нәкъ менә башкаларны да илһамландыру өчен барлык башлангычлар турында сөйләргә мөмкин булган мәйданчык”, – диде Фәрит Гыйндуллин. “Атайсал” проектында актив катнашкан өчен Башкортстан Башлыгы, “Бердәм Русия” партиясенең төбәк бүлекчәсе секретаре Радий Хәбиров Фәрит Гыйндуллинны Салават Юлаев ордены белән бүләкләде.Шул ук вакытта...Фәрит Гыйндуллин Чакмагыш районы халкын 24 июньдә 16.00 сәгатьтә Русиянең атказанган артисты, Татарстанның һәм Башкортстанның халык артисты Салават Фәтхетдинов катнашлыгында үтәчәк “Көсәкәйнең ямьле кичләре” бәйрәменә чакыра.Фәнүз ХӘБИБУЛЛИН.