Юл буйы сервисы объекттары яңыртыла Һәм өҫтәп төҙөлә

- Рәсәйҙә автомобиль транспорты менән файҙаланыусылар һаны йылына 500 миллион тәшкил итә. Күҙаллауҙар буйынса, 2035 йылға ул 700 миллионға етәсәк, – тине Дмитрий Чернышенко. - Автомобиль туристары ниндәйҙер өлөш индерһә лә, был «Туризм һәм ҡунаҡсыллыҡ индустрияһы» милли проекты күрһәткестәренә өлгәшеүгә ҙур өлөш индерәсәк. 2030 йылға беҙҙең туристар һаны 140 миллион кеше тәшкил итергә тейеш. Автомобиль туризмы иҫәбенә беҙ был күрһәткескә тиҙерәк өлгәшә аласаҡбыҙ. Дмитрий Чернышенко концепцияны булдырыу сиктәрендә идара итеүҙең һөҙөмтәле моделен формалаштырыу һәм уны бөтә илгә таратыу кәрәклеген белдерҙе. Миҫал итеп вице-премьер Башҡортостандың ыңғай тәжрибәһен килтерҙе. Республика Башлығы Радий Хәбиров сығышында, юл буйы сервисы – төбәкте үҫтереүҙең перспективалы һәм инвестициялар йәлеп итеүсе йүнәлештәренең береһе, тип хәбәр итте. Башҡортостанда 2024 йылға тиклем юл буйы сервисын үҫтереү концепцияһы ғәмәлдә. Уның төп йүнәлештәре – тармаҡ инвесторҙарына ярҙам итеү, «ер банкы» – потенциаль төҙөлөш майҙансыҡтары портфелен булдырыу. - Башҡортостанда автомобиль юлдары селтәре бик үҫешкән, шуға күрә юл буйы сервисы системаһы беҙҙең өсөн ҙур әһәмиәткә эйә, – тип билдәләне Радий Хәбиров. - Был йүнәлешкә ярҙам итеү һәм уны үҫтереү программаһы сауҙаһыҙ ер участкаларын айырым тәртиптә бүлеүҙе күҙ уңында тота. Икенсеһе – инженер һәм транспорт инфраструктураһын булдырыуға сығымдарҙы 30 миллион һумға тиклем ҡаплау инвесторҙарҙы йәлеп итә. Был бизнес өсөн ҙур ярҙам, сөнки юл буйы сервисы объекттарының уртаса хаҡы 100-200 миллион һум тәшкил итә. Инвестиция проекттарының дөйөм күләме 13 миллиард һум самаһы булған байтаҡ өлөшө бар. Юл буйы сервисы инфраструктураһының үҫеше төбәккә туристар ағымының артыуына сәбәпсе була. 2023 йылдың беренсе кварталы йомғаҡтары буйынса ул 412 мең сәфәргә еткән (Волга буйы федераль округында - өсөнсө, Рәсәйҙә 12-се урында), был уҙған йылдың ошо уҡ осоро кимәленән 29 процентҡа юғарыраҡ. Сессияла ҡатнашыусылар Башҡортостандың автотуризмды үҫтереү мәсьәләһендә комплекслы ҡарашын билдәләне һәм илдең башҡа төбәктәрендә республика тәжрибәһен таратырға тәҡдим итте. Спикерҙар илдә автотуризмдың популярлығы арта барыуын һыҙыҡ өҫтөнә алды. Уның өҫтөнлөгө шунда: өс-дүрт кешенән торған ғаилә өсөн автомобиль менән йөрөү башҡа транспорт төрҙәре менән сағыштырғанда 30-40 процентҡа арзаныраҡ. Шул уҡ ваҡытта күберәк туристик объекттарға барыу мөмкинлеге бар. Рәсәйҙә был ял төрө хеҙмәттәргә тотороҡло ихтыяжды тәьмин итә алған иң киң маҡсатлы аудиторияға эйә. – Ҡайһы бер осраҡтарҙа кәрәкле документтар алыу өсөн ике йыл һәм унан да күберәк ваҡыт китә, – тип билдәләне Радий Хәбиров. - Был процедураны ябайлаштырырға ваҡыт етте, тип уйлайым. Республика Башлығы шулай уҡ Рәсәй ҡала-ара автобустар паркын яңыртырға һәм Силәбе өлкәһе сигендә М-5 «Урал» трассаһын киңәйтеү мәсьәләһен хәл итергә тәҡдим итте. - Беҙ Рәсәй етештереүендәге ҡала-ара магистраль автобустар менән ҡыҙыҡһынабыҙ. Элек беҙ Европа автобустарын һатып алдыҡ. Бөгөн бындай класлы машиналарҙы МАЗ тәҡдим итә, тиҙҙән улар баҙарға сығасаҡ. Республика өсөн быйыл Ҡытай "Yutong" автобустары партияһын һатып алдыҡ, әлбиттә, Ватан етештереүенә булышлыҡ итеүгә лә иҫәп тотабыҙ, – тине Радий Хәбиров. - М-5 федераль трассаһының үткәреү һәләтен арттырыу мәсьәләһе лә көнүҙәк булып ҡала. Силәбе өлкәһе сигендә «тар тамаҡ» мәсьәләһен дөйөм көс менән хәл итеү мөһим. Бөгөн ул - юлдың иң ҡатмарлы участкаларының береһе. Автотуризм өсөн мөмкинлектәр ҡалдырмаған ҙур йөк транспорты ағымын үткәреүҙе ойошторорға кәрәк. Был - комплекслы мәсьәлә, ул иҡтисадтың транспорт, туристик һәм башҡа тармаҡтарын үҫтереү менән тығыҙ бәйле. Дмитрий Чернышенко Радий Хәбировтың тәҡдимдәрен хупланы һәм ҡушылыуҙарҙы рәсмиләштереү мәсьәләһе федераль кимәлдә тикшереләсәген билдәләне. Журналистар менән әңгәмәлә республика Башлығы, автотуризм иҡтисадтың үҫеш нөктәһе була ала, тип билдәләне. Сөнки был секторҙа яңы эш урындары һәм бәләкәй эшҡыуарлыҡ өсөн шарттар булдырыла.