«Профессионалитет» федераль проектында ҡатнашыусылар араһында килешеүҙәргә ҡул ҡуйылды

Бөгөн «Башинформ» агентлығында республика өсөн мөһим ваҡиға булды - 2023 йылғы «Профессионалитет» федераль проектының урта һөнәри белем биреү кластерҙарында ҡатнашыусылар араһында килешеүҙәргә ҡул ҡуйылды. Башҡортостан 2022 йылдан «Профессионалитет» федераль проектында ҡатнаша, тип хәбәр иткәйне «Башинформ». Уҙған йылдың 1 сентябрендә машиналар эшләү тармағы буйынса тәүге белем биреү үҙәге (кластер) Өфө машиналар эшләү колледжы нигеҙендә асылды. 2023 йылдың 1 сентябренә республикала тағы ете кластер асыла. Килешеүҙәр «Профессионалитет» күләмле проекты сиктәрендә төбәктә «педагогика» һәм «клиник һәм иҫкәртеү медицинаһы» йүнәлештәре буйынса урта профессиональ белем биреү кластерҙарын булдырыу һәм үҫтереүгә йүнәлтелгән. Йәмғеһе дүрт килешеүгә ҡул ҡуйылды. Атап әйткәндә, «Профилактик һәм клиник медицина өсөн кадрҙар әҙерләү үҙәге», «Педагогик белем биреү үҙәге», «Башҡортостан Республикаһының белем биреү ойошмалары өсөн кадрҙар әҙерләү үҙәге» урта һөнәри белем биреү кластерын булдырыу һәм үҫтереү өсөн партнерлыҡ тураһында килешеүҙәр төҙөлдө. “Уҡытыусылар берләшмәһен республика өсөн мөһим ваҡиға - федераль гранттар конкурсында еңеү менән тағы бер ҡат ҡотлайым. Килешеүҙәр - ул матди-техник базаны нығытыу, яңы лабораториялар асыу буйынса ниндәйҙер старт биреүсе рәсми документ булыуы аңлашыла. Әммә шуны иҫтә тотоу мөһим: оҫтаханалар булдырыу, һатып алыу процедураларын үткәреү, ҡорамалдар менән тәьмин итеү һәм башҡалар буйынса сроктарыбыҙ сикләнгән. Аңлайым, был бик ҡатмарлы, ләкин өлгөрөргә тырышырға кәрәк. Срокты бер кем дә күсермәйәсәк. Шуға күрә беҙҙең бурыс - 1 сентябрҙә конкурс һайлауында ҡатнашҡан һәм еңеү яулаған дүрт колледж "Профессионалитет" программаһына ярашлы студенттар ҡабул итеү өсөн үҙ ишектәрен асырға тейеш», - тип аңлатма бирҙе килешеүгә ҡул ҡуйғандан һуң республиканың мәғариф һәм фән министры Айбулат Хажин. Фото: "Башинформ"