Мәскәү һәм Башҡортостан көмөш йәштәге туристар менән алмаша

"Ишектәрҙе асып, йөрәктәрҙе асабыҙ" этнографик экспедицияһы Башҡортостан Республикаһының туристик ҡеүәтен арттырасаҡ. Мәскәү һәм Башҡортостан Республикаһы көмөш йәштәге туристар менән алмаша. 9 июндә Мәскәүҙән «Атҡаҙанған ял» берләшмәһенең егерме ҡатнашыусыһы Ғафури районы ауылдарына килеп, урындағы халыҡтың өйҙәрендә туҡтаясаҡ. Биш көн эсендә оло йәштәге мәскәүҙәр бейеү һәм йыр йолалары менән танышасаҡ, башҡорт кейемен кейеп ҡараясаҡ, милли аш-һыу әҙерләргә өйрәнәсәк. Ғафури районында улар Красноусол шифаханаһын, Еҙем йылғаһындағы Уҡлы ҡаяны, "Башҡортостан йөрәге" этнокомплексын һәм башҡа иҫтәлекле урындарҙы күрәсәк. «Атҡаҙанған ял» автономлы коммерцияға ҡарамаған ойошмаһы алмашыу буйынса сәйәхәттәр, белем биреү экспедициялары, өлкән быуын өсөн ижади һәм һауыҡтырыу каникулдары ойоштороу менән шөғөлләнә. Сәфәр башланғанға тиклем үк баш ҡала туристары онлайн дәрестәрҙә башҡорт халҡының мәҙәниәте, йолалары, мифтары һәм ғөрөф-ғәҙәттәре менән танышты. Дәрестәрҙе «Мәргән Уҡсы» берләшмәһенә нигеҙ һалыусы Юлай Ғәлиуллин һәм музыкант, халыҡ уйын ҡоралдарын уйлап сығарыусы Илһам Байбулдин үткәрҙе. "Ишектәрҙе асып, йөрәктәрҙе асабыҙ" этнографик экспедицияның партнеры булып Башҡортостан Республикаһының Туриндустрия һәм ҡунаҡсыллыҡ ойошмалары союзы сығыш яһаны, ул мәскәүҙәр өсөн мәҙәни программа әҙерләне. Проект тере йолалар менән танышыуға, башҡорт халҡының милли мәҙәниәтенә этнографик ҡыҙыҡһыныу булдырыуға йүнәлтелгән. "Илде, уның халҡын, тәбиғәтен яҡындан белеү өсөн сәйәхәт итеүҙән дә яҡшыраҡ ысул юҡ. Проекттың үҙенсәлеге - ҡунаҡтарҙың отелдәрҙә түгел, ә урындағы халыҡтың йорттарында йәшәүе. Республикабыҙға ҡарата һөйөү һәм оҙайлы дуҫлыҡ тап ошо рәүешле тиҙерәк барлыҡҡа килер, тип ышанабыҙ", - ти Башҡортостан Республикаһы Турсоюзы рәйесе Илдар Бикҡужин. Июль башында үҙендә мәскәүҙәрҙе ҡабул иткән Ғафури районы пенсионерҙарының баш ҡалаға яуап сәфәре планлаштырыла. Ғафуриҙар Мәскәүҙә биш көн ғаиләлә була, улар өсөн экскурсия һәм мәҙәни программа ойошторола, улар Башҡорт мәҙәниәте көндәрендә ҡатнаша. Улар милли кейемдәрҙә сәхнәгә сыға, этнографик тикшеренеүҙәрҙең һөҙөмтәләре менән таныштыра, башҡорт йырын йырлай, милли бейеү бейей, һый-ниғмәт әҙерләй һәм аш-һыу серҙәре менән уртаҡлаша. Пенсионерҙар өсөн Мәскәүгә сәйәхәт бушлай. "Ишектәрҙе асып, йөрәктәрҙе асабыҙ" этнографик экспедиция Башҡортостан Республикаһы Ғафури районының туристик потенциалын, Башҡортостан һәм баш ҡала халҡының ҡунаҡсыллығын һәм асыҡлығын, теләһә ниндәй йәштә һәм етеш тормошта сәйәхәт итеү мөмкинлеген күрһәтеү маҡсатында ойошторола. Проектты Мәҙәни башланғыстар президент фонды булышлығында «Баштурсоюз» коммерцияға ҡарамаған ойошмаһы менән берлектә «Мәҙәни мираҫ» автономлы коммерцияға ҡарамаған ойошмаһы тормошҡа ашыра. Фото: "Баштурсоюз".