Әбйәлил районының Дәүләт быуаһында саҡ бәхетһеҙ осраҡ булмай ҡала. Һыу инергә төшкән балалар араһында «Ярҙам итегеҙ!» тип ҡысҡырырға тырышып, һыуға тонсоҡҡан малайға барыһы ла иғтибар итмәй. Дәүләттән Алина Уйылданова ғына, уны күргәс, уйлап та тормай, һыуға һикерә. Уға ярҙамға Илвина Хәйетембәтова ташлана, улар ярҙағы һыуға ингәс, икенсе класс уҡыусыһын алып сыға. Һөнәре буйынса медицина хеҙмәткәре Ильвина бәләгә тарыусыға тәүге медицина ярҙамы күрһәтә. Хәҙер малай менән барыһы ла һәйбәт. Асыҡланыуынса, ул дуҫы менән күрше Ҡушай ауылынан һыу инергә килгән икән. Малайҙың ата-әсәһе ошо хәлдән һуң Уйылдановтарға улын ҡотҡарған өсөн ҡайнар рәхмәт һүҙҙәрен әйтергә килгән. Ауыр саҡта юғалып ҡалмаған герой ҡыҙ Алина Уйылданова туғыҙынсы класты тамамлаған һәм Магнитогорск педагогия колледжына физкультура уҡытыусыһына уҡырға инергә йыйына. Алина спорт менән бик дуҫ, айырыуса волейбол уйнарға ярата, ГТО-ның алтын билдәһе менән бүләкләнгән. Атаһы уны йөҙөргә өйрәткән. Ата-әсәләре - Рәмил Иштимер улы менән Елена Иосифовна ҡыҙының батырлығы менән ғорурлана, улар ғаиләһендә биш бала тәрбиәләнә. Ун биш йәшлек Алина юғалып ҡалмайынса, тәүәккәллек һәм сослоғо ғына ҙур фажиғәгә юл ҡуймаған. Афарин, Алина! Фото: "Абзелил"