Կոչ եմ անում մյուս զոհվածների ծնողներին միանալ մեզ: Այս մասին Ոստիկանության Շենգավիթի բաժնի դիմաց, լրագրողների հետ զրույցում հայտարարեց 44-օրյա պատերազմում զոհված Նորայր Մաիլյանի հայրը:
«Իմ որդին իր կյանքը տվել է հայրենիքի համար: Հիմա Գայանեին ձերբակալել են: Ծնողնե՛ր ջան, եկեք մեր կողքը կանգնեք, խայտառակություն է տեղի ունենում»,- նշեց նա:
Հղում անելով համացանցում տարածվող տեսանյութին՝ ծնողները նշում էին, որ առևանգելու մասին խոսք անգամ լինել չի կարող և որ Աշոտ Փաշինյանն ինքնակամ է նստել մեքենան:
«Ես ամենաթանկն եմ տվել այս երկրին և մեզ հետ դեռ ինչ-որ հարց ու պատասխան կա՞: Սպասում ենք, որ մեր բախտակից ընկերները գան կանգնեն մեր կողքին»,- նշեց զոհվածի հայրը:
Ծնողները հավելեցին, որ չեն համակերպվելու այն մտքի հետ, որ թուրքն իրենց երեխաների արյան վրայով քայլի:
Ավելի վաղ հայտնել էինք, որ այսօր փորձել են առևանգել ՀՀ վարչապետ Նիկոլ Փաշինյանի որդուն՝ Աշոտ Փաշինյանին. նա վնասվածք է ստացել։ Ավելի ուշ «Որդիների Կանչ» ՀԿ նախագահը հերքել էր Աշոտ Փաշինյանին առևանգելու փորձը։ Աշոտ Փաշինյանին առևանգելու կասկածի շուրջ ձերբակալվել են 44-օրյա պատերազմի զոհերի ծնողներ, տեղեկացրել էր իրավապաշտպան Ռուբեն Մելիքյանը: Armenia Today-ը նաև տեղեկացրել էր, որ Շենգավիթի քննչական բաժնի մոտ հավաքվածների և ոստիկանների միջև բախում է տեղի ունեցել։