Կառավարությանը մայիսի 18-ին տեղի ունենալիք նիստի ժամանակ կքննարկի Հնդկաստանում ՀՀ ռազմական կցորդ ունենալու հարցը:
Ըստ նախագծի՝ կցորդը կիրականացնի երկու պետությունների ռազմական և ռազմաքաղաքական համագործակցության համադրման և կորդինացման աշխատանքները, կամրապնդի երկկողմ փոխգործակցության մակարդակը, ինչպես նաև կներկայացնի երկու երկրների միջև համագործակցության հեռանկարային զարգացման վերաբերյալ առաջարկություններ:
Պաշտոնը ստեղծելու անհրաժեշտությունը բխել է այն հանգամանքից, որ երկու երկրների միջև ռազմական և ռազմատեխնիկական ոլորտում առկա է համագործակցության մեծ ներուժ: Հնդկական կողմի ռազմաարդյունաբերական համալիրի պետական կառույցների, մասնավոր կազմակերպությունների և ընկերությունների կողմից փոխգործակցություն իրականացնելու ուղղությամբ վերջին ժամանակաշրջանում ցուցաբերած մեծ հետաքրքրությունն անհրաժեշտություն է առաջացել ռազմական կցորդի հաստիք:
«Ռազմական կցորդը, Հնդկաստանի զինված ուժերի հրամանատարության հետ հաստատելով պաշտոնական հարաբերություններ, տեղի ռազմական գերատեսչության հրավերով կապահովի զորահանդեսներին, զորավարժություններին, զորաշարժերին, սպառազինության և ռազմական տեխնիկայի ցուցահանդեսներին հայկական կողմի պաշտոնական ներկայացվածությունը, կայցելի ռազմական օբյեկտներ և հաստատություններ: ՀՀ պաշտպանության նախարարության հանձնարարությամբ և ՀՀ արտաքին գործերի նախարարության ղեկավարության միջնորդությամբ՝ ռազմական կցորդը միջազգային իրավունքի նորմերով սահմանված կարգի համաձայն կարող է իրականացնել դիտորդական գործառույթներ»,- ասված է որոշման նախագծում:
2022 թվականի նոյեմբերին Հայաստանը Հնդկաստանից հրետանային համակարգերի խմբաքանակ է պատվիրել։ Հնդկական ընկերություններից մեկն առաջարկել է MArG ինքնագնաց հաուբիցներ։ Հնդկաստանում հայկական կողմի ներկայությամբ փորձարկված հաուբիցը համապատասխանություն է ցույց տվել հայ զինվորականների բոլոր չափանիշներին։ Հրետանային համակարգերի ձեռքբերման գործարքը կնքվել է DefExpo պաշտպանական ցուցահանդեսում։ 2022 թվականի սեպտեմբերի վերջին Հնդկաստանը և Հայաստանը պայմանագիր են կնքել հայկական կողմին մոտ 244 միլիոն դոլարի զենք մատակարարելու մասին, որը ներառում էր հնդկական արտադրության Pinaka MLRS-ի առաջին արտահանումը։