Хәйбулла районында тыуып-үҫкән, әле Өфө ҡалаһының "Башбланкиздат" предприятиеһының директоры булып эшләгән сая һәм эшлекле ханым Гөлсәсәк Әлибаева ошо көндәрҙә генә алыҫ Луганск һәм Донецк халыҡ республикаларында булып, махсус хәрби операцияла ҡатнашҡан яугирҙәргә кәрәк-яраҡтар тапшырып ҡайтты. Алыҫ юлда Гөлсәсәк Ҡадир ҡыҙы үҙенең шәхсән автомобилендә барҙы һәм Башҡортостандан бергә барған юлдаштарының автомобилдәрен даими рәүештә яғыулыҡ менән тәьмин итеп, уларҙы ашатыу мәсьәләләләрен дә үҙ өҫтөнә алды. Шулай уҡ яугирҙәр өсөн кәрәк-яраҡтар, аҙыҡтар тупланмаһы ла эшҡыуарҙың шәхси аҡсаһына һатып алынды. - 12 майҙа Луганск халыҡ республикаһының көнө билдәләнә, беҙ был мөһим сарала ҡатнашыу бәхетенә ирештек. Луганск халыҡ республикаһының Халыҡ Советы депутаттары Сергей Серов, Зинаида Наден менән осраштыҡ. Советтар Союзы Геройы Сафа Хәсәнов исемен йөрөткән Красный Луч ҡалаһындағы 29-сы мәктәпкә Башҡортостандан мәктәп автобусы асҡысын тапшырҙыҡ. Уны БР «Хәрби хәрәкәттәр ветерандары союзы» төбәк йәмәғәт ойошмаһы советы рәйесе, Рәсәй Геройы генерал-майор М.М. Шайморатов исемендәге ирекле мобиль отряд командиры Тимерйән Рәжәпов тапшырҙы, - ти Гөлсәсәк Ҡадир ҡыҙы. Гөлсәсәк Әлибаеваның Луганск халыҡ республикаһы сәфәре хаҡында гәзитебеҙҙең киләһе һандарында яҡындан таныштырырбыҙ. Фото: Гөлсәсәк Әлибаева фотолары