Бөгөн – Халыҡ-ара ғаилә көнө. Бөгөнгө йәштәрҙең заман ауырлыҡтарына бирешмәй, күңелдәре ҡушҡан шөғөлгә тотоноп, ҡала ерендә тип тормай, ишле балалар үҫтереп, йорт төҙөп, донъя көтөргә тырышыуҙарына һоҡланырға ғына ҡала. Альбина һәм Данис Дауытбаевтар Сибай ҡалаһының Көньяҡ ҡасабаһында йәшәй. Ҡала ерендә лә күп бала үҫтереп, матур йәшәү өлгөһөн күрһәткән ғаиләлә баһадирҙай өс ул һәм сәскәләй бер ҡыҙ үҫә. Альбина Раил ҡыҙы – Баймаҡ районының Басай ауылы ҡыҙы. Сибай медицина колледжын ҡыҙыл дипломға тамамлап, хеҙмәт юлын Покровка ауылындағы фельдшер-акушерлыҡ пунктында башлай. Ул ваҡытта буласаҡ ире Данис Кәлимулла улы Пенза өлкәһендәге 30785-се хәрби часта, Каменка ҡалаһында хеҙмәт иткән була. Көндәрҙең береһендә ауылға әрме сафынан һалдат ҡайышы ялтырап торған, йәш һәм ғәйрәтле егет ҡайтып төшә. Йәштәр таныштары аша таныша һәм бер күреүҙән ғашиҡ була. – Тәүге осрашыуыбыҙҙы әле лә хәтерләйем, күп һөйләштек, бик күп уртаҡ темалар таптыҡ, уның менән ғүмер буйы таныш кеүекмен тойолдо. Ошо мәлдә уның минең кешем булыуын аңланым, – ти Альбина Дауытова. 2009 йылдың июнендә йәштәр гөрләтеп туй үткәрә. Ауылда эш булмағанлыҡтан, йәш ғаилә Сибай ҡалаһына күсеп килә. Көньяҡ ҡасабаһынан ер бүлеме алып, шунда ваҡытлыса йәшәргә йорт ултырталар, ҙур гараж төҙөйҙәр. Ғаилә башлығы үҙмәшғүл булараҡ теркәлеп, әле ике йөк машинаһында клиенттарҙың заказдарын башҡара. Альбина Раил ҡыҙы кескәй ҡыҙы менән декрет ялында. – Һәр сабый үҙ ризығы менән тыуа. Ишле ғаиләлә балалар ярҙамсыл, хәстәрлекле булып үҫә, араһында туғанлыҡ хисе көслө, өлкәндәре бәләкәстәренә терәк , – ти бәхетле әсә. – Улдарым йорт эштәрендә ихлас ярҙамлаша, бергәләшеп манты эшләйбеҙ, билмән бөгәбеҙ. Ихата алдын таҙа тотоу, үҙҙәренең уйынсыҡтарын, велосипедтарын йыйып ҡуйыу, бер урынға ултыртыу ҙа улар иңендә. Бәләкәйҙән эшһөйәр, маҡсатлы һәм уңышлы булып үҫһен өсөн уларҙы дәртләндереп тороу мотлаҡ. Мәҫәлән, былтыр үҙҙәре тимер-томор йыйып, уны тапшырып бер аҙ аҡса эшләп алдылар. Быйыл да әле үк дәртләнеп йөрөйҙәр. Спорт яғынан да төрлө яҡлап үҫтерергә тырышабыҙ, ғаилә менән бик күп конкурстарҙа ҡатнашып, призлы урындар алабыҙ. Күмәкләшеп тәбиғәттең матур урындары буйлап сәйәхәт итергә, балыҡҡа барырға яратабыҙ. Ғаиләлә атай абруйы иң беренсе урында тора. Улдарыма һәр саҡ “атайығыҙҙан һорағыҙ”, “атайығыҙ ни әйтер” тип кенә торам. Дауытбаевтарҙың өлкән улдары Даян әле дүртенсе класты тамамлаһа, Айназ балалар баҡсаһының сығарылыш төркөмөндә. Әле уның: “Ҡасан мәктәпкә барам?”-тип түҙемһеҙләнеп йөрөгән сағы. Данир менән Әҙилә балалар баҡсаһына йөрөй. Альбина Дауытбаева күптән инде “тимер ат”ты йүгәнләгән. Күп балалы әсәгә шунһыҙ булмай ҙа: таң менән береһен балалар баҡсаһына, икенсеһен мәктәпкә алып барырға кәрәк, төштән һуң төрлө түңәрәктәргә йөрөтөргә лә тура килә. Ихаталарында өр-яңынан ике ҡатлы йорт ҡалҡып килә, балаларға уйнарға махсус бәүелсәк эшләнгән, бассейн урыны ла бар. Ни тиһәң дә, күмәк баланың мәшәҡәте лә, шатлығы ла күп. Татыу һәм матур Дауытбаевтарҙың ғаилә “һандығы”на йыл һайын муниципаль, республика һәм бөтә Рәсәй сертификаттары, грамоталар һәм дипломдар өҫтәлә бара. “Ҡыҙыбыҙ-йондоҙобоҙ саҡ ҡына ҙурайһа, ғаилә конкурсында ҡатнашырға теләк ҙур”, - ти әңгәмәсем. Күп балалы ғаилә булараҡ, дәүләт тарафынан күрһәтелгән матди ярҙам алыуы менән ҡәнәғәт булыуын билдәләп үтте, әммә йәш ғаилә булараҡ, ҡала буйынса йорт төҙөүгә ярҙам алыуға сиратҡа торһалар ҙа, сиртаттың алға түгел, ә киреһенсә, артҡа күсеүенә аптырай улар. Тормошта үҙ урынын лайыҡлы тапҡан, дүрт бала тәрбиәләгән, сәләмәт тормош алып барған, донъяларын матур һәм нурлы иткән, үҙҙәре уңған һәм эшсән булған кешеләргә нисек һоҡланмайһың?! Тап Альбина һәм Данис Дауытбаевтар кеүек бәләкәй дәүләт нигеҙҙәре ныҡ һәм көслө булғанда, илебеҙ ҡеүәтле буласағына ышаныс ҙур. Фото: Альбина Дауытбаеваның ғаилә альбомынан.