Արցախի նախկին պետնախարար Ռուբեն Վարդանյանը հայտարարել է Արցախի անվտանգության և զարգացման ճակատ ստեղծելու մասին։
«Արցախը պետք է մնա հայկական, իսկ հայության ապագա սերունդները պետք է վստահ լինեն, որ ապագա ունեն իրենց արժանի հայրենի հողում։ Այս գաղափարը միավորում է բոլորին այստեղ՝ Արցախում։ Դա մեր ընդհանուր անդրդվելի նպատակն է։ Ուրիշ նպատակ չկա։ Իսկ դրան հասնելու սկզբունքներում ունենք կամք, ոգի ու համաձայնություն։ Նպատակին հասնելու ճանապարհին յուրաքանչյուր քայլի մեջ գաղափար կա, ճանապարհ, ըմբռնում։ Իսկ առանց գաղափարի անհնար է արդյունքի հասնել։ Անհնար է արդյունքի հասնել նաև, եթե հայրենասեր ու վճռական մարդիկ չհամախմբվեն ճիշտ գաղափարի շուրջ»,- գրել է նա Telegram-ի իր ալիքում։
Նախկին պետնախարարի խոսքով՝ նախորդ երկու ամիսների ընթացքում մի շարք քաղաքական, հասարակական ուժերի, մտավորականների, Արցախի տարբեր ոլորտների ներկայացուցիչների լայն ներգրավվածությամբ քննարկվել է Արցախի ապագայի տեսլականը և մշակվել ճանապարհային քարտեզ։ Նա նշել է, որ այդ քարտեզը ներկայացվել է Արցախի Հանրապետության նախագահին, Ազգային ժողովին և Անվտանգության խորհրդին և բավարար հիմք է այն գործողությունների ծրագրի վերածելու համար,-նշել է նա։
«Կատարված աշխատանքի արդյունքում մենք՝ ճնշող մեծամասնությամբ, համաձայնության եկանք Արցախի անվտանգության և զարգացման ճակատի ստեղծման շուրջ, որը պետք է դառնա համախմբման առանցքը։ Եվ այս համախմբումը ոչ թե անձերի շուրջ է, ոչ թե այս կամ այն ուժի, այլ Արցախի ապագայի շուրջ՝ վերականգնելով նրա ամբողջականությունը և Արցախը հայ պահելու նպատակը»,- ասաց Վարդանյանը։
Նրա խոսքով, իրավիճակն այնպիսին է, որ «մենք կամ համախմբվում ենք և մեր կամքը պարտադրելով՝ անենք ամեն ինչ, որպեսզի փոխենք իրադարձությունների ընթացքը, կամ էլ ենթարկվենք մեզ պառակտող, ապակողմնորոշող և անզոր դարձնող նարատիվների ու սադրանքների»։ «Հայրենիքի ճակատագիրը զոհասեղանին է, հետևաբար անիմաստ են դառնում անձնական ամբիցիաները, շահերն ու պաշտոնները»,- ընդգծեց նա՝ նշելով, որ առաջիկա 3-4 օրվա ընթացքում մանրամասներ կհաղորդի Արցախի անվտանգության և զարգացման ճակատի մասին։
Ավելի վաղ՝ 2022 թվականի օգոստոսին, Վարդանյանը հայտարարել էր Արցախի անվտանգությանն ու զարգացմանն աջակցության համահայկական ճակատ ստեղծելու նախաձեռնության մասին։