29 мартта Ҡалмыҡстан Республикаһының Сарпа районы Садовое ауылында Зәйтүнә Әлбаеваның кәүҙәһен эҙләү тамамланған. ...1942 йылдың авгусында Садовое ауылында 44-се айырым һауа күҙәтеүе, хәбәр итеү һәм элемтә батальоны взводынан (ВНОС) алты ҡыҙ — элемтәсе һәм күҙәтеү һағы начальнигы урынлашҡан була. Шул иртәлә ауылда беренсе тапҡыр немец моторазведкаһы күренә. Улар сәғәт 11-ҙә күҙәтеү һағын уратып, баҫып алырға ҡарар итә. Ҡаршылыҡ көтөлмәй. Әммә уларҙы Башҡортостан ҡыҙы Зәйтүнә Әлбаеваның винтовка залпы ҡаршылай. Тиңһеҙ алышта ул үлемесле яралана. Күрше һаҡтарҙағы ҡыҙҙар Зәйтүнәнең ғүмеренең һуңғы минуттары нисек үтеүен ишетә. Яҡынлашып килгән немец мотоциклсыларын күреп, ул был хаҡта ротаға хәбәр итә, элемтә линияһы аша осоп барған фашист самолеты тураһында мәғлүмәт бирә һәм: “Ут асам”, – ти. Карабиндан һәм автоматтар атыуҙар ишетелә. Һәм тағы ла Зәйтүнәнең тауышы яңғырай: "Ҡыҙҙар, хушығыҙ, Ватаным өсөн үләм!” Немецтар киткәндән һуң урындағы халыҡ ҡыҙҙы һуңғы сиккәсә алышҡан окопта ерләй. Ришат Аҡтуғанов, Миәкә районы хакимиәте башлығы был турала бына ниҙәр һөйләне: “Эҙәрмәнлек экспедицияһы барышында “Миәкә хәтере” отряды эҙәрмәндәре ҡалмыҡ коллегалары менән берлектә яҡташыбыҙ Зәйтүнә Әлбаеваның кәүҙә ҡалдыҡтарын тапты. Сарпа районы хакимиәте һәм ауыл халҡы ҡатнашлығында һәләк булған урында мосолман йолаһы буйынса тантаналы ерләү үткәрелде. Геройҙың иҫтәлеге мәңгеләштерелде!” 2023 йылдың 26 мартынан 9 майына тиклем Рәсәй Оборона министрлығы булышлығында “Юнармия” хәрәкәте тәҡдиме менән “Геройға исемен ҡайтарығыҙ” Бөтә Рәсәй хәрби-патриотик акцияһы үткәрелә. Акция барышында обелисктарҙа, Ватанды һаҡлаусыларға мемориалдарҙа һәм хәрби ҡәберлектәрҙә тәртип урынлаштырыу, Ватанды һаҡлаусыларҙың һәм тыл хеҙмәтсәндәренең исемдәрен асыҡлау буйынса архивтарҙа эҙләнеү, мәғариф ойошмаларында “Батырлыҡ дәрестәре” үткәреү, Бөйөк Ватан һуғышы ветерандарына һәм хәрбиҙәргә – махсус хәрби операция яугирҙәренә ҡотлауҙар яҙыу кеүек изге эштәр ҡаралған. Зәйтүнә Әлбаеваның батырлығы тураһындағы тулы мәғлүмәтте ошонда инеп уҡығыҙ: https://bash.bashgazet.ru/obshestvo/25552-yar-hushyy-vatanym-sn-lm.html Фото: vk.com /rishataktuganov