“Башҡортостан” гәзите Урындағы үҙидара органдары хеҙмәткәрҙәре көнө алдынан “Бәйләнештә” төркөмөндә конкурс иғлан итте. Унда республикабыҙҙың төрлө райондарынан иң уңған, әүҙем, егәрле, эшлекле 16 ауыл биләмәһе башлығы көс һынаша. Улар араһында Борай районының Борай ауыл биләмәһенең хакимиәт башлығы Азат Латипов та бар. Ул 2009 – 2019 йылдарҙа Борай районы хакимиәтенең финанс идаралығында баш белгес булып эшләй. 2019 йылдан Борай ауыл биләмәһенең хакимиәт башлығы вазифаһын ышанып тапшыралар. Азат Ҡатиф улы Латипов Борай районының Борай ауылында тыуып үҫкән. Тыуған еренең илһөйәре яҡташтарының тормошон яҡшыртыу өсөн барлыҡ саралар күрә, шуға ла ҡыҫҡа ғына ваҡытта район етәкселеге алдында ла абруй ҡаҙанған. Ә Борай ауылы биләмәһе хакимиәте ҡаҙаныштарына килгәндә, ысынлап та бында бик күп эштәр тормошҡа ашырыла. Мәҫәлән, былтыр хакимиәт эше, тәү сиратта, халыҡтың йәшәү кимәлен күтәреүгә, уны социаль яҡлауға йүнәлтелгән иҡтисадты, социаль өлкәне, ижтимағи мөнәсәбәттәрҙе артабан үҫтереү буйынса алып барылған. Атап әйткәндә, биләмәләрҙе төҙөкләндереү, ҡаты коммуналь ҡалдыҡтарҙы йыйыу һәм сығарыу, урамдарҙы яҡтыртыу, юлдарҙың торошон яҡшыртыу кеүек мәсьәләләрҙе хәл итеү буйынса етди эштәр башҡарғандар. Быйыл Борай ауыл хакимиәтенең отчет ултырышында район советы рәйесе Алик Рәмил улы: “Борай ауыл биләмәһе хакимиәте көнүҙәк мәсьәләләрҙе хәл итеп, беҙ йәшәгән норматив хоҡуҡи базаны булдырып, һөҙөмтәле эшләне”, – тип Азат Латиповтың командаһының эшенә ыңғай баһа бирҙе. Быйыл “Торлаҡ һәм ҡала мөхите” милли проектының “Уңайлы ҡала мөхитен булдырыу” федераль программаһы сиктәрендә Борай ауылында Сару йылғаһы ярын төҙөкләндереүҙе тамамлаясаҡтар. Һөҙөмтәлә Борай халҡына ял итеү, спорт менән шөғөлләнеү өсөн уңайлы урын барлыҡҡа киләсәк. Бынан алдағы йылдарҙа ла бихисап эштәр башҡарылған. Мәҫәлән, Борай ауылы үҙәгендә район символын ҡуйғандар, светофор урынлаштырғандар. Шабай ауылы зыяратын кәртәләгәндәр. Ауылдарҙа контейнер майҙансыҡтары эшләгәндәр, яугир интернационалистарға, моряктарға обелиск ҡуйғандар. Район үҙәгендә фонтан барлыҡҡа килгән. Дүсмәт ауылына юл төҙөлгән, шулай уҡ ауыл урамдарына ҡырсынташ һәм асфальт түшәлгән. “Башҡорт ихаталары” проектында ҡатнашып, ихаталарҙы төҙөкләндереүгә өлгәшкәндәр. Ғөмүмән, Борай ауылы биләмәһе йылдан-йыл матурая, заманса йөҙ ала. Тырыш, булдыҡлы Азат Ҡатиф улына уңыштар теләйбеҙ. Фото: Азат Латиповтың шәхси архивынан.