Башҡортостан халҡын 28-29 июндә Мәскәүҙә “Яңы осор өсөн көслө идеялар” федераль форумы эшендә ҡатнашырға саҡыралар. Сараны Стратегик башланғыстар агентлығы һәм “Росконгресс” фонды ойоштора. Форумдың төп маҡсаты – Рәсәй суверенитетын нығытыуға һәм милли маҡсаттарға өлгәшеүгә тос өлөш индерәсәк башланғыстарҙы һәм проекттарҙы тормошҡа ашырыуҙы асыҡлау һәм ярҙам итеү. Идеялар киләһе алты йүнәлеш буйынса ҡабул ителә: милли социаль башланғыс, милли технологик башланғыс, милли кадрҙар инициативаһы, милли экологик башланғыс, эшҡыуарлыҡ, һанлы сервистар. Ғаризалар 2023 йылдың 26 апреленә тиклем ҡабул ителә. Башҡортостан Республикаһы төбәк этабында мең идея йыйыу бурысын ҡуйҙы. Был хаҡта ошо көндәрҙә “Рәсәй” медиаүҙәгендәге матбуғат конференцияһында Башҡортостан Республикаһы Хөкүмәте Премьер-министрының беренсе урынбаҫары – Башҡортостан Республикаһының иҡтисади үҫеш һәм инвестиция сәйәсәте министры Рөстәм Моратов хәбәр итте. – Яңы идеялар, үҙаңды нығытасаҡ проекттар эҙләү федераль кимәлдә хуплау табасаҡ. Бөгөн Башҡортостанда күп кенә үҫешкән йүнәлештәр тормошҡа ашырыла. Федераль форумдың идеяһынан файҙаланып, республика ижади кешеләрҙе, прогрессив инициативаларҙы асыҡлау механизмын һәм уларға ярҙам системаһын булдыра. 26 апрелгә тиклем тәҡдимдәребеҙҙе федераль кимәлгә сығарырға тейешбеҙ. Илгә һеҙҙең идеяларығыҙ кәрәк! – тине республиканың беренсе вице-премьеры. Идея инициаторҙарына булышлыҡ итеү өсөн Башҡортостанда профилле власть органдарының, муниципалитеттарҙың, эшлекле һәм профессиональ берләшмәләрҙең, ғилми һәм белем биреү ойошмаларының, үҫеш институттарының берлектәге эше ойошторолған. Форум йүнәлештәре буйынса ойошторолған командалар авторҙарға, ҙурлығына ҡарамаҫтан, идеяларҙы теркәүҙә һәм эшләп бөтөүҙә алдан эксперт баһаһын һәм методик ярҙам тәьмин итәсәк. “Яңы осор өсөн көслө идеялар” форумына идеялар һайлап алыуҙың төп критерийҙары – проблеманың мөһимлеге, яңылығы, тәҡдим ителгән ҡарарҙың һөҙөмтәлелеге, лидерҙың һәм команданың һөҙөмтәгә өлгәшеү өсөн кәрәкле компетенциялары булыуы. Идеяғыҙҙы 2023 йылдың 26 апреленә тиклем https://идея.росконгресс.рф форумдың федераль платформаһында тәҡдим итергә була. Ә Башҡортостан авторҙарға үҙ идеяларын һәм форумда ҡатнашыу буйынса һорауҙарын форумдың республика ойоштороу комитетына ебәрергә тәҡдим итә: Silnye_idei@bashkortostan.ru Форум тураһында анығыраҡ мәғлүмәт республиканың Инвестиция порталында урынлаштырылған: https://investrb.ru/ru/press-center/event/priem-idey-i-initsiativ-na-forum-silnye-idei-dlya-novogo-vremeni/ Башҡортостан Республикаһы муниципаль йәки төбәк кимәлендә йәшәйештең һәм эшмәкәрлектең теге йәки был өлкәһен үҫтереүҙе тәьмин итергә һәләтле идеяларҙы хуплаясаҡ. “Яңы осор өсөн көслө идеялар” федераль форумының йомғаҡлау этабында илебеҙ йәмғиәте һәм иҡтисады өсөн юғары ҡеүәтле идеяларҙы авторҙар Рәсәй Федерацияһы Президенты Владимир Путиндың үҙенә тәҡдим итәсәк.