Ռուստամ Բադասյանը լրագրողների հետ զրույցում նշել է հարկային եկամուտները թաքցնելու այն սխեմայի մասին, որը բացահայտելու համար ՊԵԿ-ին երկար ժամանակ է պահանջվել:
Անդրադառնալով Հայաստան-Թուրքիա սահմանը երրորդ երկրների և դիվանագիտական անձնագրեր ունեցողների համար բացելու զարգացումներին՝ նա նշել է. «Մենք հիմա այլ պետական մարմինների հետ աշխատում ենք, որ հաստատման դեպքում այդ սահամանային կետը գործի: Իրականացնում ենք նախապատրաստական աշխատանքներ՝ մաքսային ընթակարգերը սահուն հունով կիրառելու համար»:
Ավելի վաղ ՔԿ-ից և ՊԵԿ-ից Armenia Today-ին հայտնել էին, որ գործարար Սամվել Ալեքսանյանին պատկանող ընկերությունում խուզարկություններ են իրականացնում:
Հիշեցնենք նաև, որ ըստ ՔԿ-ի, «Ալեքս Տեքստիլ» ՍՊ ընկերության կողմից հարկային մարմին ներկայացված հաշվարկային փաստաթղթերով ցույց է տրվել ավելի քիչ շրջանառություն և 2019թ. սեպտեմբերից մինչև 2023թ. փետրվար ամիսների ավելացված արժեքի հարկի և ակցիզային հարկի միասնական, 2019-2021 թվականների շահութահարկի տարեկան հաշվարկներում մտցվել են խեղաթյուրված տվյալներ։
Բադասյանի մատնանշած գործի շրջանակներում ավելի վաղ մեղադրանք էր առաջադրվել «Նոր Զովք» ՍՊԸ սեփականատիրոջը և երկու աշխատակիցներին՝ ՀՀ քրեական օրենսգրքի 290-րդ հոդվածի 3-րդ մասի 1-ին և 2-րդ կետերով (մի խումբ անձանց կողմից նախնական համաձայնությամբ առանձնապես խոշոր չափերով հարկեր չվճարելը, որը պատժվում է ազատազրկմամբ՝ չորսից ութ տարի ժամկետով) նախատեսված հանցավոր արարքներ կատարելու, իսկ ծրագրային աջակցություն ցուցաբերած ՍՊԸ սեփականատիրոջը՝ նշված հանցավոր արարքների կատարմանն օժանդակելու համար։
Մանրամասները՝ տեսանյութում: