Башкортстан аграрийлары Иранга үсемлек мае һәм ашлык озатачак

- Иран белән хезмәттәшлекнең күп кенә юнәлешләрен билгеләдек. Агросәнәгать секторы кысаларында үзара хезмәттәшлеккә килгәндә, без Иранга үсемлек мае озату турында фикер алышабыз. Хәзер түләү механизмнары буенча сөйләшүләр алып барыла. Гомумән алганда, без анда 100 мең тоннага кадәр май җибәрә алабыз. Икенче юнәлеш - ашлык. Бу - ике төп юнәлеш,- дип белдерде "Интерфакс" агентлыгына Премьер-министр Андрей Назаров. Сүз, аерым алганда, республикадан Иранга көнбагыш һәм рапс мае, шулай ук арпа озату турында бара. Премьер-министр сүзләренчә, хәзерге вакытта махсус оештырылган эшче төркем йөкләрне китерүнең нәтиҗәле ысулларын билгели. Назаров искәрткәнчә, Башкортстан хакимияте Агыйдел шәһәрендә 2008 елдан бирле махсус икътисади порт зонасы булдыру башлангычы белән чыга. Тиешле төбәк башлангычы Русия Президенты Владимир Путинның Башкортстан Башлыгы Радий Хәбиров белән 13 гыйнварда Уфада ике яклы очрашуы барышында хуплау тапты. Фото: bashinform.ru