Կառավարությունը վերաբացեց Արցախից բռնի տեղահանվածներին հիփոթեքային վարկ տրամադրելու ծրագիրը

Կառավարությունը դեկտեմբերի 12-ի նիստում որոշում կայացրեց վերաբացել ծրագիրը, որով Արցախից բռնի տեղահանվածները Տավուշի մարզի Բաղանիսում, Բերքաբերում, Կիրանցում և Ոսկեպարում անհատական բնակելի տուն կառուցելու համար կարող են հիփոթեքային վարկ ստանալ։

Գործադիրը ծրագրի մեկնարկը տվել էր 2024 թվականի հունիսի 27-ին։ Դեկտեմբերին ծրագիրը վերաբացվում է, քանի որ հայտերի ընդունման սահմանաչափի պատճառով այլ շահառուներ չեն կարողացել օգտվել ծրագրից։

«Նոյեմբերի 4-ի դրությամբ՝ ՀՀ աշխատանքի և սոցիալական հարցերի նախարարության Միասնական սոցիալական ծառայության կողմից հաստատվել է շուրջ 1976 շահառուի հայտ, որից 1758-ի հետ հիփոթեքային վարկավորման պայմանագիրը կնքվել է, և վարկը տրամադրվել է։ Ընդ որում՝ օգոստոսի 1-ի դրությամբ՝ ՄՍԾ կողմից հաստատված և գործընկեր ֆինանսական կազմակերպությունների կողմից հավաքագրված հայտերի թիվը գերազանցում էր սահմանաչափը՝ 2000-ը, ինչի կապակցությամբ նոր դիմումների ընդունման գործընթացը դադարեցվել էր ֆինանսական կազմակերպությունների կողմից։ Արդյունքում՝ շահառուները չեն կարողացել օգտվել Տավուշի բնակավայրերի համար սահմանված արտոնությունից՝ 5 մլն դրամի հավելումից»,- ասված է նախագծի հիմնավորման մեջ։

Դեկտեմբերի 12-ի որոշմամբ՝ Արցախից բռնի տեղահանվածները կկարողանան վարկ վերցնել նաև Վայոց ձորի մարզի Գոմք բնակավայրում տուն կառուցելու համար։

Կառավարության՝ մայիսին կայացրած մեկ այլ որոշմամբ՝ արցախցիների համար բնակարան ձեռք բերելու աջակցության ծրագիր էր մեկնարկել։ Ծրագրի նպատակն է Ադրբեջանի կողմից 2020 թվականի սեպտեմբերի 27-ին սանձազերծած պատերազմից, ինչպես նաև 2023 թվականի սեպտեմբերի 19-ից հետո Արցախից բռնի տեղահանված շուրջ 25 000 ընտանիքի Հայաստանում բնակարանով ապահովել։ Ծրագրի մասնակիցներին կառավարությունը կտրամադրի բնակարանի ձեռքբերման կամ տան կառուցման հավաստագրեր:

Կարդացեք նաև Armenia Today-ի՝ «Արցախցիներն ինչպե՞ս կարող են օգտվել բնակարան ձեռք բերելու պետական աջակցությունից» ուղեցույցը։

Նորություններին հետևեք մեր կայքում, ինչպես նաև Telegram-ում և YouTube-ում